სასამართლოს გადაწყვეტილებით მსახიობ ლევან ჯიბღაშვილს, რომელიც ნარკოდანაშაულისთვის არის ბრალდებული აღკვეთის სახით გირაო შეეფარდა. პროცესის დასრულების შემდეგ ჟურნალისტებთან ჯიბღაშვილის ადვოკატმა სასამართლოს გადაწყვეტილება შეაფასა. 

ლევან ჯიბღაშვილის ადვოკატს მიაჩნია, რომ პროკურატურის მოთხოვნა 15 ათასი ლარის გირაოს შეფარდებაზე თანაზომიერი არ იყო, რადგან მისივე თქმით, ლევან ჯიბღაშვილს ადმინისტრაციული ჯარიმაც კი არასოდეს ჰქონია. 

"თანამშრომლობდა გამოძიებასთან. არ უარყოფდა ბრალს და ფორმალური საფუძველი, რომ მკაცრი ზომა მოეთხოვათ არ არსებობდა. პროკურატურამაც გაითვალისწინა ეს, როცა პატიმრობის ნაცვლად გირაო მოითხოვა და სასამართლომ როცა შეამცირა გირაოს ოდენობა." - განაცხადა ამირან გიგუაშვილმა.

ადვოკატის თქმით, ლევან ჯიბღაშვილი წარდგენილ ბრალს სრულად ეთანხმება. 

„ნარკოტიკიც და ჩანთაც იყო მისი", - თქვა ადვოკატმა. 

ადვოკატი არ ასახელებს ნარკოტიკული საშუალების ტიპს და ასევე იმას თუ რა რაოდენობის ნარკოტიკი აღმოუჩინეს ბრალდებულს. ნარკოტიკის რაოდენობაზე და ტიპზე ინფორმაციას არც პროკურატურა არ ავრცელებს.