გარემოს დაცვის კომიტეტის კანონპროექტით, ავტობუსით უბილეთო მგზავრობა 5-ის ნაცვლად, 20 ლარით დაჯარიმდება. კომიტეტის მიერ მომზადებული საკანონმდებლო ინიციატივით, ცვლილება ადმინისტრაციულ სამართალდარღვევათა კოდექსში შედის. 

შენიშვნის სახით, კანონში ასევე გაჩნდება ჩანაწერი, რომ მგზავრი ვალდებულია, მგზავრობის დასაწყისიდანვე შეიძინოს ბილეთი ან ელექტრონულად გადაიხადოს მგზავრობის ტარიფით განსაზღვრული თანხა.

იმ შემთხვევაში, თუ დაჯარიმებული პირი 30 დღის ვადაში არ გადაიხდის ჯარიმას, მას საურავის სახის 50 ლარის ნაცვლად 40 ლარი დაეკისრება. ხოლო საურავის დარიცხვიდან 30 დღის ვადაში ჯარიმისა და საურავის გადაუხდელობის შემთხვევაში, დამრღვევის მიმართ განხორციელდება ჯარიმისა და საურავის გადახდის უზრუნველყოფის ღონისძიებას, საქართველოს კანონმდებლობით დადგენილი წესით.

განმარტებით ბარათში მოცემულია ინფორმაცია ბიუჯეტის შემოსულობების სახაზინო კოდის „შემოსავალი სანქციებიდან  უბილეთო მგზავრობის გამო“.

„მაგალითად, ქ. თბილისის მუნიციპალიტეტის ბიუჯეტში მობილიზებულ იქნა: 2014 წელს - 754 535 ლარი; 2015 წელს - 396 810 ლარი; 2016 წელს - 490 692 ლარი. კანონპროექტის ამოქმედების შედეგად, მთლიანობაში ჯარიმის ოდენობის 15 ლარით გაზრდით და საურავის ოდენობის 10 ლარით შემცირებით, მოსალოდნელია დამატებითი შემოსავლები მიიღონ მუნიციპალიტეტების ბიუჯეტებმა", - ვკითხულობთ განმარტებით ბარათში.

კანონპროექტი პარლამენტმა პირველი მოსმენით უკვე მიიღო, დღეს იურიდიულ საკითხთა კომიტეტში მისი მეორე მოსმენით განხილვა გაიმართა.