ამერიკის ელჩის მოვალეობის შემსრულებლის, როს უილსონის უფლებამოსილების ვადა მაისის შუა რიცხვებში იწურება.
ელჩი უილსონის დროებითი უფლებამოსილება დაიწყო 2018 წლის ნოემბერში.
„ელჩ უილსონს ჰქონდა დიდი პატივი, ყოფილიყო საქართველოში ამერიკის შეერთებული შტატების წარმომადგენელი და ხელი შეეწყო ჩვენს ქვეყნებს შორის ორმხრივი თანამშრომლობის განვითარებისთვის. მას შემდეგ, რაც ელჩი როს უილსონი დატოვებს თანამდებობას, ვაშინგტონის სრული ნდობით აღჭურვილი ელისაბეთ რუდი შეასრულებს ამერიკის ელჩის მოვალეობას საქართველოში“, - ნათქვამია საელჩოს მიერ გავრცელებულ განცხადებაში.
აშშ-ს ელჩს იან კელის უფლებამოსილების ვადა 2018 წლის აპრილში ამოეწურა. მას შემდეგ აშშ-ს საქართველოში ელჩი არ ჰყავს და მხოლოდ მოვალეობის შემსრულებლის რანგში არის წარმოდგენილი.
გამოცემა Foreign Policy კი 2018 წლის 10 დეკემბერს წერდა, რომ ვაშინგტონში მოქმედმა და ყოფილმა ოფიციალურმა პირებმა დაუდასტურეს ინფორმაცია საქართველოს ხელისუფლების მხრიდან ელჩობის კანდიდატის, ბრიჯეტ ბრინკის დაბლოკვის შესახებ.
Foreign Policy-ის ინფორმაციით, საქართველომ აშშ-ს უარი უთხრა დიპლომატიური შეთანხმების ხელმოწერაზე, რომლითაც თბილისში ელჩად ბრიჯეტ ბრინკი უნდა დანიშნულიყო. ევროპასა და საქართველოში ნამუშევარი გამოცდილი დიპლომატის დაბლოკვის მიზეზი ის გახდა, რომ ბრინკს მიხეილ სააკაშვილისადმი კეთილგანყობილი დამოკიდებულება აქვს.
როგორც Foreign Policy წერს, მისი წყაროების ცნობით, საქართველოს პოზიციის უკან უშუალოდ ბიძინა ივანიშვილი დგას.
ბრიჯეტ ბრინკი მიმდინარე წლის მარტში სლოვაკეთში აშშ-ის ელჩად დანიშნეს.