ყვავილები და მარწყვი - სასჯელაღსრულების მე-5, მე-16 და მე-15 დაწესებულებაში მსჯავრდებულებმა კენკროვანი კულტურებისა და ყვავილების მოყვანის თეორიული და პრაქტიკული კურსი გაიარეს.
აღნიშნულ პროექტს არასამთავრობო ორგანიზაცია „სიდა“ ევროკავშირის მხარდაჭერით ახორციელებს. პროექტის პარტნიორები არიან საქართველოს ფერმერთა ასოციაცია (GFA) და DVV international-ია.
ორგანიზატორების ცნობით, პენიტენციურ დეპარტამენტთან შეთანხმებით, შეარჩიეს 3 მიზნობრივი დაწესებულება (#5, #16, #15), სადაც აშენდა და გაიმართა სათბური და ჩატარდა კენკროვანი კულტურებისა და ყვავილების წარმოების თეორიული და პრაქტიკული კურსი, სამუშაოზე დაფუძნებული სწავლების მიდგომით; ასევე მოეწყო სასათბურე კონსტრუქციები და სანერგე ჩითილებისთვის ადგილები და დაიწყო ყვავილებისა და მარწყვის წარმოება.
„შევისწავლეთ ყვავილის მოვლა თესვიდან რეალიზაციამდე, გავიარეთ პრაქტიკა თეორიასთან ერთად. ზოგადად მაინტერესებდა მცენარეები, მათი მოვლა, მოყვანა, მაქვს სოფლის მეურნეობა და სამომავლოდ ვგეგმავ, რა ცოდნაც აქ შევიძინე, გამოვიყენო გარეთაც“, - ამბობს მსჯავრდებული ვატო კასრაძე.
„ამ შესაძლებლობამ ფერმერული მიმართულებით განგვივითარა უნარები. ვისწავლეთ მცენარის მოვლა, მოყვანა, და ა.შ. მაინტერესებდა ფერმერული საქმე, მე მქონდა გარეთ მიწა და მაინტერესებდა კერნკროვანი კულტურის მოყვანა... განწყობაზეც მოქმედებს, ნაკლებად გრჩება დრო ფიქრისთვის, უფრო კონცენტრირებული ვარ ამ საქმისკენ“, - გვიყვება მსჯავრდებული ვაკო ქორიძე.