საქართველოს მესამე პრეზიდენტის, მიხეილ სააკაშვილის თქმით, საქართველოში მის მიერ დაწყებული პროექტები თავისი შვილებივით უყვარს. ახლა კი, მისი თქმით, როცა დღევანდელი ხელისუფლება ამ პროექტებს ანადგურებს, თავს შვილმკვდარ მამად გრძნობს.
„მე მყავს ორი შვილი და ძალიან კარგად ვიცი რას ნიშნავს შვილის სიყვარული, მაგრამ ჩემი შვილები არიან, ასევე ქუთაისში პარლამენტი, რომელიც მოკლეს და გაანადგურეს, ჩემი შვილი იყო ამერიკული ტექნოლოგიური უნივერსიტეტი ბათუმში, რომელიც ამ ოროსანმა გაანადგურა ძალიან შეგნებულად და გააბანძა იდეა.
ჩემი შვილი იყო ქართული ჯანდაცვის სისტემა, რომელიც გაანადგურეს, ჩემი შვილი იყო საქართველოს შეიარაღებული ძალები, რომელიც პრაქტიკულად გაანადგურეს, ჩემი შვილი იყო ქართული სამხედრო წარმოება, რომელიც მომიკლეს.
მე ვარ ნამდვილად შვილმკვდარი მამა და შეიძლება ზოგიერთი გააჩერო, მაგრამ როგორც მაჩალიკაშვილი ვერ გააჩერეს, მეც ვერ გამაჩერებენ და ნამდვილად ბოლომდე ვიძიებ შურს ჩემი შვილის მკვლელებზე.
მაგრამ ჩვენი შურისძიება არის არა ვინმეს დაჭერა, კიდევ ერთხელ მინდა ხაზი გავუსვა, ჩვენი შურისძიება არის არა ფეხებით დაკიდება, არამედ საქართველოს ამოთრევა ამ ჭაობიდან, სწრაფი განვითარება, რომ ყველა ესენი აღმოჩნდნენ არარელევანტურები და სამარცხვინოები“, - განაცხადა მიხეილ სააკაშვილმა მიუნხენში ემიგრანტებთან გამართულ შეხვედრაზე.
