თბილისის მერის, კახა კალაძის თქმით, ტაქსის მძღოლებისთვის დამატებითი ვაუჩერები გამოიყოფა. ღებვისა და ქიმწმენდის ვაუჩერების აღება შეეძლებათ მძღოლებს, რომლებმაც 2018 წლის 10 ოქტომბრის ჩათვლით აიღეს ნებართვა და შემდეგ შეცვალეს ავტომობილი ან ლიცენზია 2018 წლის 11 ოქტომბრიდან 2019 წლის 1 იანვრამდე აიღეს.

„ჩვენი გადაწყვეტილებით, პირები, რომლებმაც გასული წლის 10 ოქტომბრის ჩათვლით გაიარეს ტაქსის რეგისტრაცია და შეცვალეს სატრანსპორტო საშუალებები, ახალი ნებართვის აღების მიუხედავად, შეძლებენ, მიმართონ კომპანიას და მიიღონ ღებვის, ფირის გადაკვრისა და ქიმწმენდის ვაუჩერები. ვაუჩერის აღება მათ 1 ივლისიდან 10 აგვისტოს ჩათვლით შეეძლებათ.

ასევე მნიშვნელოვანი შეღავათი დავუშვით 11 ოქტომბრიდან 1 იანვრამდე გაცემული ნებართვის მფლობელებზე. მათ ვაუჩერული პროგრამა საერთოდ არ ეხებოდათ, თუმცა, თუ ეს პირები ფლობენ არაუმეტეს 15 წლის სატრანსპორტო საშუალებებს, ისინიც მიიღებენ ვაუჩერებს“, - განაცხადა კახა კალაძემ თბილისის მუნიციპალიტეტის მთავრობის სხდომაზე.

თბილისის მერის თქმით, გარდა ამ შეღავათისა, A კატეგორიის ტაქსის მძღოლებისთვის დამატებითი საპარკინგე ადგილებიც გამოიყოფა. კალაძის თქმით, 14 ახალ მისამართზე 34 ადგილი გამოიყოფა და A კატეგორიის ტაქსის მძღოლები, საერთო ჯამში, ცალკე გამოყოფილი 437 ადგილით ისარგებლებენ.