როგორც საგანგებო სიტუაციების მართვის სამსახურში „ლიბერალს“ განუცხადეს, ამ ეტაპზე ბორჯომში ხანძრის ორივე კერა ლოკალიზებულია, სალიკვიდაციო სამუშაოები კი დილიდან განახლდება.
უწყების ცნობით, შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველები ბორჯომის ხეობაში, სოფელ საკირეს მიმდებარედ, მთის ფერდობზე არსებულ ტყის მასივში ხანძრის ლოკალიზების სამუშაოებს ინტენსიურ რეჟიმში აწარმოებდნენ.
როგორც სამსახურში აცხადებენ, ადგილზე დილამდე დარჩებიან მეხანძრე-მაშველები, ხვალიდან სამუშაოებში სასაზღვრო პოლიციის ვერტმფრენებიც ჩაერთვებიან.
ამ ეტაპზე უცნობია, რა რაოდენობის ფართობზე გაჩნდა ხანძარი.
შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ს 187-ე მუხლის მე-2 ნაწილის „ა“ ქვეპუნქტით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს. დანაშაული 3-დან 5 წლამდე ვადით თავისუფლების აღკვეთას ითვალისწინებს.