"გირჩის" მთაწმინდის მაჟორიტარობის კანდიდატმა ჰერმან საბომ ბრიფინგზე "გირჩის" ჩატარებული ეგზიტპოლების შესახებ ისაუბრა. 

შედეგების გამოცხადებამდე საბომ აღნიშნა, რომ მათ მოხალისეებთან ერთად გადაწყვიტეს აეწყოთ "კუსტარული" კვლევითი ორგანიზაცია, ამაში დაიხმარეს მხარდამჭერი, რომელსაც გამოცდილება აქვს კვლევით საქმიანობის მიმართულებით და ჩაატარეს ეგზიტპოლი, რომელსაც, როგორც ჰერმან საბომ აღნიშნა, "განსაკუთრებული მეთოდოლოგია არ აქვს" და არც ის იციან, რამდენპროცენტიანი  იქნება ცდომილება საბოლოო შედეგებთან. სულ 1700 კაცი გამოკითხეს. 

საბოს თქმით, სპეკულაციების თავიდან აცილების მიზნით გადაწყვიტეს, რომ მხოლოდ მათი პარტიის შედეგები გამოაცხადონ. მისი თქმით, „გირჩის“ კანდიდატმა არჩევნებში ხმების 15.86% მიიღო. 

"თუ ეს რეალური პროცენტია, ნიშნავს, რომ საპრეზიდენტო არჩევნების შემდეგ „გირჩმა“ გააორმაგა შედეგი", - თქვა საბომ. მისივე თქმით, ამავე ეგიზტპოლის მიხედვით, პირველ ტურში ვერცერთმა კანდიდატმა ვერ გაიმარჯვა და მეორე ტურში გადავიდნენ შავგულიძე და კახაძე.