ზუგდიდის მერობის ყოფილმა კანდიდატმა, სანდრა რულოვსმა „გაერთიანებული ოპოზიციის" წევრებთან შეხვედრის შემდეგ საპროტესტო მოძრაობის დაწყება დააანონსა.
„გუშინდელი ე.წ. არჩევნების შემდეგ (რაც იყო თვეების განმავლობაში და განსაკუთრებით ბოლო დღეებში სპეცოპერაცია) ჩვენ გადავწყვიტეთ, რომ საპროტესტო ტალღა დაიწყოს ზუგდიდიდან, რაც მთელ ქვეყანას გადაედება და შუშის სასახლესთან, თბილისში დამთავრდება.
ჩვენ მოვითხოვთ ქვეყნიდან ივანიშვილის წასვლას. დაგვანებოს თავი. იმიტომ, რომ მისი მოქმედება, მისი ე.წ. მმართველობა ყველასთვის ყველანაირ ზღვარს გადასულია. ჩვენ ივანიშვილს აღარ უნდა ჩავატარებინოთ არჩევნები, იმიტომ, რომ არ შეუძლია. ივანიშვილი არ ატარებს არჩევნებს. ამიტომ ჩვენ ყველანი უნდა დავირაზმოთ, მთელი ქვეყნის მასშტაბით. არ დავტოვებ არც ერთ ქუჩას, ქალაქს, სოფელს, უნდა მივიდეთ თბილისამდე და ივანიშვილი უნდა მოვიშოროთ ამ ქვეყნიდან. ეს საპროტესტო ტალღა უკვე დაწყებულია", – აცხადებს სანდრა რულოვსი.