სენაკის საკრებულოს წევრი „ერთიანი ნაციონალური მოძრაობიდან“ ბორის სოსელია ამბობს, რომ საკრებულოს სხდომის დასრულების შემდეგ მას ფრაქცია „ქართული ოცნების“ თავმჯდომარე თავს დაესხა და ფიზიკური შეურაცხყოფა მიაყენა.
როგორც ბორის სოსელია „რუსთავი 2-თან“ ჰყვება, მათ შორის შელაპარაკება სხდომაზე დაიწყო. ფრაქცია „ქართული ოცნების“ თავმჯდომარემ განაცხადა, რომ ზუგდიდში არჩევნები დემოკრატიულად გაიმართა და გამარჯვებულისთვის უნდა მიელოცათ, რაც ბორის სოსელიამ გააპროტესტა.
„ჩხუბი მოჰყვა იმას, რომ მივულოცოთ გამარჯვებულებსო, დემოკრატიულად ჩატარდა არჩევნებიო. ამის შემდეგ მე ვთქვი, რომ არჩევნები დემოკრატიულად არ ჩატარებულა, ამას არ ერქვა დემოკრატია და ეს იყო ძალისმიერი მეთოდებით ხელისუფლების მიტაცება-მეთქი.
ამას მოჰყვა შემდეგ შელაპარაკება სიტყვიერი, მაგრამ იქვე ჩაცხრა. საკრებულოს სხდომის დასრულებისთანავე, მოულოდნელად, სრულიად რომ არ ველოდი ისე, მომაყენა ფიზიკური შეურაცხყოფა და ამის შემდეგ ცუდად გავხდი“, - ჰყვება ბორის სოსელია.
