საქართველოს პრემიერ-მინისტრის, მამუკა ბახტაძის თქმით, ჭიათურაში მძიმე ვითარებაა და იზიარებს მაღაროელების მოთხოვნას შრომის უფლებებსა და უსაფრთხოებაზე, თუმცა, მისივე თქმით, კომპანიას ჰქონდა შეთავაზება გაფიცულ მაღაროელებთან და მოუწოდებს ორივე მხარეს, დროულად მიაღწიონ შედეგს.
„ჭიათურაში არსებული სიტუაცია არის მძიმე და მე ვიზიარებ ჩვენი მაღაროელების სამართლიან და ობიექტურ მოთხოვნას ისეთ საკითხებზე, როგორებიცაა შრომის უფლებები, უსაფრთხოება, ადგილზე სამედიცინო მომსახურება, კვება და სხვ.
ვიცი, რომ კომპანიამ მიიღო გადაწყვეტილება, გააკეთეს შეთავაზება და მინდა, ორივე მხარეს ვთხოვო, რაც შეიძლება ინტენსიური დიალოგის შედეგად დროულად ჩამოყალიბდეთ მისაღებ შედეგებზე. ეს არის სისტემური მნიშვნელობის მქონე საწარმო ჩვენი ეკონომიკისთვის და მისი სრულფასოვანი ფუნქციონირება ძალიან მნიშვნელოვანია“, - განაცხადა პრემიერ-მინისტრმა.
ჭიათურაში 15 მაისს საღამოს შპს „ჯორჯიან მანგანეზის“ სამთო გამამდიდრებელ კომბინატში ე.წ. ვახტურ რეჟიმზე გაფიცვა დაიწყო. თავდაპირველად ერთი ცვლა 150 მაღაროელი გაიფიცა, მოგვიანებით კი დანარჩენებიც შეუერთდნენ. ამჟამად ყველა მაღაროელი გაფიცულია და საწარმო გაჩერებული. კომპანიის შენობის ადმინისტრაციიდან მაღაროელებმა ჭიათურის მერიასთან გადაინაცვლეს და იქ აგრძელებენ პროტესტს.
მაღაროელები ხელფასის მომატებას (50%-იან ზრდას), კვების გაუმჯობესებას და სამედიცინო მომსახურებას მოითხოვენ.
გაფიცვიდან მეორე დღეს მუშებთან მმართველი პარტიის წარმომადგენლები, „ქართული ოცნების“ პოლიტიკური მდივანი ირაკლი ღარიბაშვილი, პარლამენტის თავმჯდომარე ირაკლი კობახიძე და თბილისის მერი კახა კალაძე მივიდნენ. ისინი კომპანიის წარმომადგენლებთან ერთად მაღაროელებს დაჰპირდნენ, რომ კომპანია იმ დღიდანვე დაიწყებდა მათი მოთხოვნების შესრულებას.
ამის შემდეგ მაღაროელები კომპანიის წარმომადგენლებს შეხვდნენ, მაგრამ მოლაპარაკება უშედეგოდ დასრულდა. როგორც მაღროელები ამბობენ, კომპანიის შეთავაზება იყო ხელფასების 10 -15%-იანი ზრდა, ისიც ეტაპობრივად და კომპანიის ხელმძღვანელობასთან შეთანხმების შემდეგ. ამ პირობას მაღაროელები არ დასთანხმდნენ.
ამის შემდეგ 15 მაღაროელმა შიმშილობა დაიწყო. ისინი მე-7 დღეა შიშილობენ.
კომპანიაში ამბობენ, რომ მაღაროელების ქმედება არაკანონიერია და სამართლებრივ ჩარჩოებს სცდება, თუმცა, ვითარების განმუხტვის მიზნით, ხელმძღვანელობამ დასაქმებულებს ხელფასის 25 %-იანი მატება, შპს „ჯორჯიან მანგანეზში“ დაგეგმილი რეორგანიზაციის ხარჯზე, მაინც შესთავაზა. მიუხედავად ამისა, კომპანიის ცნობით, „დასაქმებულებმა აღნიშნულ წინადადებაზე კატეგორიული უარი განაცხადეს და უკანონო გაფიცვა გააგრძელეს“.
„შპს „ჯორჯიან მანგანეზში“ მიიჩნევენ, რომ მაღაროელების მხრიდან ხელფასის 50%-იანი მატების მოთხოვნა არაადეკვატური და რეალობასთან შეუსაბამოა.
შიმშილობასთან ერთად მაღაროელებმა პროტესტის კიდევ ერთ უკიდურეს ზომას მიმართეს. ერთ-ერთმა მაღაროელმა პირი ამოიკერა.