საქართველოს საგარეო საქმეთა მინისტრი დავით ზალკალიანი ზვიად ანანიაშვილის მიერ გავრცელებულ კადრებს გამოეხმაურა, რომელზეც ჩანს, რომ სავარაუდოდ აზერბაიჯანელებს დავით გარეჯის კომპლექსში, ჩიჩხიტურის მონასტრის მიმართულებით გზა გაჰყავთ. ზალკალიანი ამბობს, რომ ამ საკითხზე ინფორმაცია არ აქვს და გადაამოწმებს როგორც დელიმიტაციის კომისიის ფარგლებში, ისე მესაზღვრეებთან.
„მეც ახლა გავიგე საინფორმაციო საშუალებიდან. ბუნებრივია, ამ ყველაფერს გადავამოწმებთ. იცით, რომ პარალელურად ბაქოში მიმდინარეობს დელიმიტაციის კომისიის პირველი შეხვედრა. ყველა ინფორმაცია გადამოწმდება ამ კომისიის ფარგლებში.
მინდა, კიდევ ერთხელ მოვუწოდო ყველას, თავი შევიკავოთ ემოციური განცხადებებისგან. აუცილებელია, რომ ჩვენ ამ მგრძნობიარე თემატიკიდან გამომდინარე, ყველა საკითხი გავიაროთ კომისიის ფარგლებში. უნდა გადამოწმდეს სად, ვის მიერ კონტროლირებად ტერიტორიაზე ხდება ეს. ჩვენ გვყავს იქ მესაზღვრეები, რომლებისგანაც მჭირდება ზუსტი ინფორმაცია, ისევე, როგორც ჩვენს კომისიას“, - განაცხადა ზალკალიანმა მთავრობის სხდომის დასრულების შემდეგ.
დღეს ინტერნეტში გავრცელდა ფოტო და ვიდეოკადრები, რომელშიც ჩანს, როგორ გაჰყავს გზა ტრაქტორს. კადრების ავტორი ზვიად ანანიაშვილი წერდა, რომ აზერბაიჯანის კონტროლირებად ტერიტორიაზე ტექნიკაა მობილიზებული და ჩიჩხიტურის მონასტრის მიმართულებით გზას აკეთებენ.
