თბილისის ბაგა-ბაღებს მომავალი კვირიდან საკვები პროდუქტით კომპანია „მზიური“ მოამარაგებს -  აღნიშნული გადაწყვეტილება თბილისის მერიამ და საბავშვო ბაგა-ბაღების მართვის სააგენტომ მიიღეს. 

სააგენტოს მიერ გავრცელებულ ინფორმაციაში ნათქვამია, რომ  არაერთი შეხვედრა გაიმართა სხვადასხვა სადისტრიბუციო კომპანიასთან, მაგრამ „აღნიშნულ სფეროში საქმიანობის გამოცდილება სულ რამდენიმე კომპანიას აღმოაჩნდა."

„მოლაპარაკების შედეგად შეირჩა კომპანია „მზიური", რომელსაც აქვს 15-წლიანი სადისტრიბუციო გამოცდილება (თვეში 4500 სავაჭრო ობიექტს ამარაგებს). კომპანია საჯარო ბაგა-ბაღებს 60 დასახელების საკვებ პროდუქტს დროულად მიაწვდის და აიღებს სრულ პასუხისმგებლობას მათ ხარისხზე.

პირველ ეტაპზე, 27 მაისიდან, კომპანია „მზიური“ მხოლოდ ვაკისა და საბურთალოს რაიონებში მდებარე ბაღებს მოამარაგებს, ხოლო 30 მაისიდან უკვე სრულად დაფარავს 180-ვე საჯარო ბაღის კვებით მომარაგებას.

აღნიშნული კომპანია ბაგა-ბაღებს მოამარაგებს გარდამავალ პერიოდში, 1 ივლისამდე, ხოლო მომავალი სასწავლო წლიდან გამარჯვებული კომპანია ტენდერის საფუძველზე გამოვლინდება." - ნათქვამია განცხადებაში. 

შპს „მზიურის“ მფლობელია აკაკი ახვლედიანი. ის ასევე ფლობს შპს „აგროჰაბს“. 2014 წლამდე ფლობდა 60%-იან წილს შპს „ნუგეშში", რომელიც 2016 წლიდან შეზღუდული პასუხისმგებლობის საზოგადოება „ნიკორა ტრეიდს“ ეკუთვნის. 

აკაკი ახვლედიანს სხვა შპს-ებშიც აქვს წილი.