განათლების, მეცნიერების, კულტურისა და სპორტის სამინისტროსთან თსუ-ისა და ილიაუნის სტუდენტები საპროტესტო აქციას მართავენ. როგორც ისინი ამბობენ, მინისტრს ამ დრომდე არ გამოუცია ბრძანება, რომლის მიხედვითაც, ე.წ. პრეზიდენტის სტიპენდიების გაცემის პროცედურა უნდა დაწყებულიყო.
სტუდენტები მოითხოვენ, მინისტრმა დროულად გამოსცეს ბრძანება, რათა სტიპენდია მიიღონ. მათივე თქმით, შარშან მინისტრის ბრძანება მაისის დასაწყისში უკვე გამოცემული იყო. სამინისტროში ამბობენ, რომ შესაბამისი ბრძანება უკვე მომზადებულია, უნივერსიტეტებს არაუგვიანეს ხვალისა მიეწოდებათ ინფორმაცია და, საჭიროების შემთხვევაში, შეეძლებათ, დაიწყონ შესაბამისი პროცედურა.
განათლების სამინისტროში აცხადებენ, რომ ბრძანება უკვე მომზადებულია და არაუგვიანეს ხვალისა ყველა უნივერსიტეტს ექნება შესაბამისი ინფორმაცია და მათ თავის მხრივ შეეძლებათ სტიპენდიის გაცემისთვის საჭირო პროცედურა დაიწყონ. მათი განმარტებით, სტიპენდიების გაცემამდე ყველა სტუდენტის გადამოწმება ხდება, ხომ არ აქვს რომელიმეს სტატუსი შეჩერებული და ა.შ. პროცესი კი ამ პროცედურების გამო გახანგრძლივდა.
