შსს-ს ადამიანის უფლებათა დაცვის დეპარტამენტის ინფორმაციით,  სექსუალური შევიწროების შესახებ კანონში ცვლილების შემდეგ შსს-მ სექსუალური შევიწროების საქმეზე სამართალდამრღვევი გამოავლინა. სასამართლომ სამართალდამრღვევს  300 ლარის ოდენობით ჯარიმა დააკისრა.

„2019 წლის 3 ივნისს შინაგან საქმეთა სამინისტროს ქუთაისის საქალაქო სამმართველოს მიმართა დაზარალებულმა, რომელიც მიუთითებდა უცნობი მამაკაცის მხრიდან მის მიმართ სექსუალური შევიწროების შესახებ.

შესაბამისი ღონისძიებების შედეგად პოლიციის მიერ იდენტიფიცირებული იქნა 1973 წელს დაბადებული ვ. მ., რომელმაც ქუჩაში სექსუალური შევიწროება განახორციელა 1986 წელს დაბადებული მ. ს.-ს მიმართ.

მოპოვებული მტკიცებულებებით დადგინდა, რომ ვ.მ.-მ დაზარალებულს შესთავაზა სექსუალური ხასიათის ურთიერთობა, რაც ამ უკანასკნელისთვის იყო დამამცირებელი და ღირსების შემლახავი.

სასამართლომ სრულად გაიზიარა შინაგან საქმეთა სამინისტროს არგუმენტები და ვ. მ. ცნო სამართალდამრღვევად სექსუალურ შევიწროებაში, საქართველოს ადმინისტრაციულ სამართალდარღვევათა კოდექსის 166-ე პრიმა მუხლის პირველი ნაწილით. ვ.მ.-ს სახდელის სახით 300 ლარის ოდენობით ჯარიმა დაეკისრა“,-ნათქვამია გავრცელებულ განცხადებაში. 

განცხადებაში აღნიშნულია,  რომ  დაზარალებულმა პოლიციას მიმართა სექსუალური შევიწროებისთანავე, დაუყოვნებლივ, რამაც ხელი შეუწყო მტკიცებულებების დროულად შეგროვებასა და სამართალდამრღვევის დადგენას.

___________________

 2019 წლის 3 მაისს, ძალაში შევიდა კანონი, რომლითაც სექსუალური შევიწროება ადმინისტრაციულ სამართალდარღვევად იქნა მიჩნეული.

სექსუალური შევიწროება არის საზოგადოებრივ ადგილებში პირის მიმართ არასასურველი სექსუალური ხასიათის ქცევა, რომელიც მიზნად ისახავს ან/და იწვევს მისი ღირსების შელახვას და პირს უქმნის დამაშინებელ, მტრულ, დამამცირებელ, ღირსების შემლახველ ან შეურაცხმყოფელ გარემოს.