პრემიერ-მინისტრის მრჩეველმა ირაკლი ჩიქოვანმა „ტვ პირველის“ ეთერში ისაუბრა კანცელარიის წინ მიმდინარე აქციისა და კონტრაქციის შესახებ.
ირაკლი ჩიქოვანის თქმით, სამართალდამცველებმა ყველაფერი უნდა გააკეთონ იმისთვის, რომ ვითარება არ დაიძაბოს. საუბარი იმაზე, რომ რომელიმე ჯგუფის ინტერესები იყოს შელახული, აბსოლუტურად ზედმეტია.
„ვხედავ, რომ სამართალდამცველები მაქსიმალურად მობილიზებული არიან და საფრთხეების თავიდან არიდების გამო მნიშვნელოვანია, გაგრძელდეს კონსულტაციების ის პროცესი, რომელიც ორგანიზატორებს აქვთ შინაგან საქმეთა სამინისტროსთან. შსს მათ შესთავაზებს ადეკვატურ შესაძლებლობას, რომ მათი სამართლებრივი უფლებები უზრუნველყოფილი იყოს.
მე ვერ და არ ვიტყვი, რომ რაიმე ფორმით ვინმეს უფლებები უნდა იზღუდებოდეს. აუცილებელია, მაქსიმალური თავშეკავება გამოიჩინოს ყველამ და საკუთარი აზრის გამოხატვაში არავითარ შემთხვევაში არ უნდა იყოს შელახული სხვისი უფლება.
ეჭვგარეშე და კითხვის გარეშეა ნებისმიერი ადამიანის უფლების რეალიზების საკითხი. მთავრობის მეთაურის და ზოგადად მთავრობის კონკრეტული პასუხი არის ის, რომ მთავრობა დღეს ემუშავება ყველა მხარეს იმისთვის, რომ ყველას უფლება იქნეს რეალიზებული. ეს არის რეალობა, რომლის წინაშეც ჩვენ დღეს ვდგავართ.
პრემიერი დღეს იმყოფება დალასში, იქვე არიან მთავრობის წარმომადგენლები და დარწმუნებული ვარ, რომ სამინისტროც და უწყებებიც შესაბამის განცხადებებს გააკეთებენ. როცა პრემიერ-მინისტრი ჩამოვა, დარწმუნებული ვარ, ამ საკითხს გამოეხმაურება“, - აცხადებს ირაკლი ჩიქოვანი.
„თბილისი პრაიდის" ორგანიზატორები კანცელარიის მოშორებით აქციას მართავენ. ჰომოფობიურად განწყობილი ჯგუფი კი კონტრაქციას ატარებს და კანცელარიის წინ იმყოფება. მათ შორის პოლიციის ცოცხალი კორდონია.