ჰომოფობიური გამონათქვამებით გამორჩეული ბიზნესმენი ლევან ვასაძე, რომელმაც „სახალხო რაზმებით" პატრულირება დააანონსა, მხარდამჭერებს კომბლების სხვენში დაწყობისკენ მოუწოდა.
„მინდა, გაგიკეთოთ ერთ-ერთი ძალიან დიდი საჩუქარი. მეტი საჩუქარი არ იქნება და გეშინოდეთ, თუ ქვეყანაში გამოიწვევთ არეულობას. მინდა, ჩვენს მხარდამჭერებს, საპროტესტო მოძრაობას მოვუწოდო, რომ კომბლები შეაწყონ სხვენში. როგორც გახსოვთ, კომბლები არასდროს არ იყო განკუთვნილი ამ უბედური მამათმავლების და მათი პროპაგანდისტებისთვის. ეს იყო იმ შემთხვევისთვის, თუ პოლიცია ჩვენ შეგვდგებოდა წიხლებით და დაგვიწყებდა ცემას, მაგრამ რადგან შსს-მ თქვა, რომ „პრაიდი“ არ იქნება, მე არ მაინტერესებს, მამათმავლები რას ჭიჭყინებენ და რადგან მათ ეს სიტყვა პირველ დღეს შეგვისრულეს, თუ გახსოვთ, გავაუქმეთ ქუჩების პატრულირება. აი, ახლა ბოლო საჩუქარი ჩვენგან სახელმწიფოს: კომბლები სხვენში! ჩამოვიღოთ მაშინ, როცა მოვა ის მთავრობა, რომელიც კიდევ ერთხელ გაგვიბედავს, რომ „პრაიდს“ ჩაგიტარებთ. ჩვენ იქ მოვალთ შიშველი ხელებით, ხელზე თეთრი ცხვირსახოცებით“, - აცხადებს ვასაძე ვიდეომიმართვაში.
სახალხო დამცველის ნინო ლომჯარიას თქმით, შსს „პრაიდის“ ჩატარებას ეწინააღმდეგება უსაფრთხოების რისკების გამო. როგორც ლომჯარია ამბობს, შსს-ს წარმომადგენლებმა განაცხადეს, რომ ღია სივრცეში „პრაიდი“ არ ჩატარდეს.
„თბილისის პრაიდის" ორგანიზატორთა განცხადებით კი მიუხედავად არსებული რისკებისა, საქართველოს ისტორიაში პირველი ღირსების მარში ძალაშია: „ჩვენ არ ვაპირებთ მის გაუქმებას".
