თბილისის საქალაქო სასამართლომ 20-21 ივნისის აქციების მოვლენების გამო დაკავებული თავდაცვის ყოფილი მინისტრი ირაკლი ოქრუაშვილი პატიმრობაში დატოვა. მასთან ერთად ციხეში რჩებიან იგივე ბრალდებით დაკავებული თორნიკე დათაშვილი და გიორგი ჯავახიშვილიც.  

ოქრუაშვილის ადვოკატი მამუკა ჭაბაშვილი სასამართლოს დამატებით გარანტიად 500 000 ლარიან გირაოს სთავაზობდა. ამასთან მას მსუბუქი აღმკვეთი ღონისძიების პირობების შესრულებაში თავდებად რამდენიმე ადამიანი, მათ შორის, ჟურნალისტი ინგა გრიგოლია და ოპოზიციის წარმომადგენელი პაატა დავითაიაც უდგებოდა, თუმცა სასამართლოსთვის არც ეს გარემოება აღმოჩნდა გადამწყვეტი.

საქმის პროკურორის განცხადებით, გირაოს გაზრდის ფაქტი არ ამცირებს ბრალდებულს მიმალვისა და გამოძიების პროცესისთვის ხელი შეშლის რისკს, რაც გაიზიარა კიდეც სასამართლომ.

ოქრუაშვილის ადვოკატის მამუკა ჭაბაშვილი მიიჩნევს, რომ სასამართლოს უნდა გაეთვალისწინებინა მათ მიერ სოლიდური გირაოს შეთავაზება, რაც რეალურად უზრუნველყოფდა აღმკვეთი ღონისძიების მიზნებს, თუმცა როგორც იგი აცხადებს, 500 000 კი არა 5 მილიონიც რომ შეგვეთავაზებინა იგივე შედეგს მიიღებდნენ, ვინაიდან ოქრუაშვილის დაჭერა სამართლებრივი გზებით არ გადაწყვეტილა და ამ პროცესში გარეშე ძალები იყვნენ ჩარეულნი.