„ლელოს" დამფუძნებელი, მამუკა ხაზარაძე მაია ცქიტიშვილზე დღეს გაკეთებული სექსისტური განცხადების შემდეგ სოციალურ ქსელში წერს, რომ ქალთა თანასწორობა და უფლებების დაცვის საკითხი მისთვის და მისი თანაგუნდელებისთვის პრინციულად მნიშვნელოვანია.
ხაზარაძის თქმით, ეს გამოთქმა არ გულისხმობდა მინისტრის სქესს და ზუსტად იგივე კონტექსტში ახსენა ხაჭაპურის ცხობა ინგა გრიგოლიას გადაცემაში პროკურატურაზე საუბრისას.
„ჩემი დღევანდელი განცხადება მაია ცქიტიშვილთან დაკავშირებით ადამიანების ნაწილმა აღიქვა როგორც სექსისტური.
თუ ვინმემ ეს გამონათქვამი ქალების შეურაცხყოფად ჩათვალა, მინდა ხაზგასმით განვმარტო: ეს გამოთქმა არ გულისხმობდა მინისტრის სქესს. ზუსტად იგივე კონტექსტში ვახსენე ხაჭაპურის ცხობა გასულ კვირას ინგა გრიგოლიას გადაცემაში პროკურატურაზე საუბრისას. („ხაჭაპურებივით აცხობენ საქმეებს“).
მინდა ძალიან მკაფიოდ განვაცხადო ორი რამ: ქალთა თანასწორობა და უფლებების დაცვის საკითხი ჩემთვის და ჩემი თანაგუნდელებისთვის პრინციპულად მნიშვნელოვანია; და ამის დასტურია ბევრი ქალი ჩვენს გუნდში და თანასწორი გარემო, რომელსაც აქ ვქმნით.
მეორე, რომ არ იყოს ორაზროვნება, მინისტრი ცქიტიშვილი არაკომპეტენტურია ისევე როგორც ოცნების მთავრობა ბიძინა ივანიშვილის თამადობით.
საკმარისია ხაჭაპურზე კომენტარები, ისაუბრეთ გაჩერებულ ქვეყანაზე", - წერს ხაზარაძე.
„მაია ცქიტიშვილს წარმოდგენა არა აქვს საერთოდ რა არის ინფრასტრუქტირა. შეიძლება კარგად აცხობს ხაჭაპურებს, მაგრამ მე არ ვიცი რა გამოცდილება ჰქონდა მას წინა ცხოვრებაში, როცა მილიარდებს ესე ვთქვათ აბარებენ", - ამის შესახებ საზოგადოებრივი მოძრაობა „ლელოს” დამფუძნებელმა მამუკა ხაზარაძემ დღეს ჟურნალისტებს განუცხადა.
