საქართველოს პრემიერ-მინისტრი გიორგი გახარია 35 წლის დავით მუმლაძის მკვლელობის საქმეს ეხმაურება.
რუსთავში მომხდარი 35 წლის მამაკაცის მკვლელობის ფაქტზე დაკავებულ 5 პირს შორის 2 შინაგან საქმეთა სამინისტროს თანამშრომელია. პრემიერმა ამ ფაქტს მძიმე შემთხვევა უწოდა და განაცხადა, რომ ასეთი ერთეული შემთხვევები 40 000 პოლიციელს ჩრდილს ვერ მიაყენებს.
„ეს არის უაღრესად მძიმე აღსაქმელი, მძიმე კომპონენტი, მძიმე შედეგი. თუმცა ამასთანავე უნდა გავითვალისწინოთ, რომ ასეთი ერთული შემთხვევები ორმოცი ათას პოლიციელს ჩრდილს ვერ მიაყენებს. არიან პოლიციელები, რომლებიც ამ ქვეყანას ღირსეულად და საკუთარი სიცოცხლის რისკის ფასად ემსახურებიან".
გახარიას განცხადებით, თუ დადასტურდება, რომ სამართალდამცავი დანაშაულს ჩადის, მიდგომა იქნება ბევრად უფრო მკაცრი, დაუნდობელი და შეურიგებელი. მისივე თქმით, ვერასოდეს ვერავინ ვერ დააყენებს ათასობით კეთილსინდისიერი პოლიციელის ყოველდღიურ საქმიანობას და ღირსებას კითხვის ნიშნის ქვეშ ერთეული შემთხვევების გამო. თუმცა, ის არ აპირებს, რომ ამ ერთეულ შემთხვევებსაც შეურიგდეს.
„სამინისტროში დაწყებულია რეფორმები სისტემური განახლების მიზნით და აუცილებელია, რომ პოლიციაში ფასეულობების დონეზე შეიცვალოს მიდგომები როგორც მოქალაქის, ფუნქცია-მოვალეობების და ქვეყნის წინაშე ვალდებულებების ნაწილში, ასევე პოლიციელების ყოველდღიური შრომის ეფექტურობის გასაზრდელად“, - განაცხადა გახარიამ მთავრობის სხდომის დაწყებამდე.
