„ხელისუფლების პიარ სამსახურის მზარდი ხარჯები“ -  არასამთავრობო ორგანიზაცია „საერთაშორისო საზოგადოება საქართველოს“ კვლევას აქვეყნებს, რომელიც 194 უწყებიდან  გამოთხოვილ ინფორმაციას მოიცავს . ორგანიზაციის  მთავარი მიგნება კი  საჯარო უწყებებში საზოგადოებასთან/მედიასთან ურთიერთობის დეპარტამენტში 2018 წლის მონაცემებით დასაქმებული ადამიანები არიან. 

ანგარიშის თანახმად, საჯარო უწყებების საზოგადოებასთან/მედიასთან ურთიერთობის დეპარტამენტში დასაქმებულთა საერთო რაოდენობა 2018 წელს, 2017 წელთან შედარებით, დაახლოებით, 4%-ით არის გაზრდილი.   2017 წელს 194 უწყების პიარსამსახურში დასაქმებული იყო 996 თანამშრომელი, ხოლო 2018 წელს - 1037.

კვლევაში ვკითხულობთ, რომ 2018 წელს, წინა წელთან შედარებით, პიარსამსახურში დასაქმებულთა ანაზღაურება (ხელფასი, პრემია, ბონუსი, დანამატი) დაახლოებით, 2 მილიონ ლარამდე არის გაზრდილი, რაც, 10%-მდე ზრდას წარმოადგენს. 2017 წელს 194 უწყების პიართანამშრომელთა ანაზღაურებამ, საერთო ჯამში,18 111 258 ლარი შეადგინა, 2018 წელს კი - 20 047 896 ლარი.

ეს კი იმას ნიშნავს, რომ 2013 წლიდან დღემდე ყოველწლიურად საზოგადოებასთან ურთიერთობის სამსახურებში დასაქმებული ადამიანების რაოდენობა და მათი ანაზღაურებისთვის დახარჯული თანხა იზრდება.

„მთავრობის ადმინისტრაციამ პიარსამსახურში დასაქმებულთა რაოდენობის და მათი ანაზღაურების შესახებ ორჯერ განსხვავებული ინფორმაცია მოგვაწოდა. მოგვიანებით განმარტეს, რომ მონაცემები შეეშალათ, მაგრამ ზუსტი ინფორმაცია, მოთხოვნის მიუხედავად, აღარ მოგვცეს“, - ნათქვამია „საერთაშორისო გამჭვირვალობა საქართველოს“  კვლევის ანგარიშში.

ყველაზე მეტი - 73 თანამშრომელი, მედიასთან/საზოგადოებასთან ურთიერთობის სამსახურში საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროშია დასაქმებული, მას  თავდაცვის სამინისტრო მოსდევს.

პიარის თანამშრომელთა ანაზღაურებაში ყველაზე მეტ თანხას საქართველოს თავდაცვის სამინისტრო ხარჯავს, მას ცოტათი ჩამორჩება საქართველოს პარლამენტი და შინაგან საქმეთა სამინისტრო.