უმრავლესობა კიდევ ერთმა დეპუტატმა მარიამ ჯაშმა დატოვა. მისი თქმით, ის ასევე განათლების, მეცნიერების და კულტურის კომიტეტის თავმჯდომარის პოსტსაც ტოვებს. როგორც დეპუტატმა აღნიშნა, კანონპროექტის ჩაგდების შემდეგ თითქმის 3 საათი გავიდა და ეს დრო სპეციალურად გამოიყენა, რომ ემოციურ ფონზე მიღებული გადაწყვეტილება არ ყოფილიყო.
თამარ ჩუგოშვილმა და კიდევ 6-მა დეპუტატმა საპარლამენტო უმრავლესობა დატოვეს
„ქართულ ოცნებაში" ჩემი ყველაზე კარგი და საყვარელი კოლეგები რჩებიან. მე ეს დრო გამოვიყენე ასევე, იმისთვის, რომ მათ გავსაუბრებოდი და საქმის კურსში ჩამეყენებინა. ვტოვებ „ქართული ოცნების" უმრავლესობას და შესაბამისად ვტოვებ განათლების, მეცნიერების და კულტურის კომიტეტის თავმჯდომარის პოსტს.
მიუხედავად იმისა, რომ პირადად მე ბუნებრივია მხარი დავუჭირე პროპორციულ სისტემაზე გადასვლას, მიუხედავად იმისა, რომ შეიძლება დაუსრულებლად დისკუსია, რომელი საარჩევნო სისტემა არის უკეთესი, ამ შემთხვევაში ჩვენ 2 თვის წინ ის პირობა, რომელიც მივეცით ჩვენს საზოგადოებას და საერთაშორისო თანამეგობრობას 93 დეპუტატის თანხმობით და ხელმოწერით, ეს იყო პრინციპული საკითხი, რომ გაგვეტანა აღნიშნული გადაწყვეტილება," - განაცხადა მარიამ ჯაშმა.
მარიამ ჯაშის მსგავსად უმრავლესობა კიდევ ერთმა დეპუტატმა ზაზა ხუციშვილმაც დატოვა. მანამდე კი თამარ ჩუგოშვილმა, ირინა ფრიუძემ, გიორგი მოსიძემ, დიმიტრი ცქიტიშვილმა, თამარ ხულორდავამ და სოფიო ქაცარავამ საპარლამენტო თანამდებობები და საპარლამენტო უმრავლესობა დატოვეს
