ოპოზიციური პარტიის წარმომადგენლებმა და სამოქალაქო აქტივისტებმა ბოქლომი მთავრობის კანცელარიასაც დაადეს.
თავდაპირველად აქციის მონაწილეები ბოქლომის დადებას მთავარ შესასვლელზე ცდილობდნენ, თუმცა მათ ამის საშუალება ადგილზე მობილიზებულმა პოლიციამ არ მისცა. მცირე შელაპარაკება პოლიციასთან გიგი უგულუვას მოუვიდა, რომელიც მათგან იმ კანონის განმარტვას ითხოვდა, რომლის მიხედვითაც კანცელარიის კარზე ბოქლომის დადებას უკრძალავდნენ. საპატრულო პოლიციის უფროსმა ვაჟა სირაძემ, მათ ბოქლომის დასადებად სხვა ალტერნატიული კარი შესთავაზა, „ბოქლომი დაადონ შენობის გვერდზე, ფორმალურად, სადაც კარები არ არის".
საბოლოოდ, დემონსტრანტებმა ბოქლომი კანცელარიის ერთ-ერთ გვერდითა ჭიშკარს დაადეს.
საპროტესტო აქცია კანცელარიასთან მთავრობის სხდომის პარალელურად მიმდინარეობდა.
დღესვე ოპოზიციური პოლიტიკური პარტიების ახალგაზრდული ჯგუფები საპროტესტო აქციას პარტია „ქართული ოცნების" თავმჯდომარის სახლთან 14:00 საათზე გამართავენ.
პროტესტის პარალელურად, 18 ნოემბერს აქციაზე დაკავებულების სასამართლო პროცესები თბილისის საქალაქო სასამართლოში დღეს განახლდება. საპროტესტო აქციის ფონზე, მოსამართლემ გადაწყვეტილება 25 აქტივისტთან დაკავშირებით უნდა მიიღოს.