თბილისის საქალაქო სასამართლომ, 18 ნოემბრის აქციის დაშლის დროს ადმინისტრაციული წესით 37 დაკავებულიდან 12 - სამართალდამრღვევად ცნო და მათ მიმართ სხვადასხვა სიმძიმის სანქციები გამოიყენა.

მოსამართლე ვალერიანე ფილიშვილმა ათ დემონსტრანტს ადმინისტრაციული პატიმრობა შეუფარდა. მათგან: ირაკლი ნადირაძეს - 13 დღით; ბექა ბასილაიას - 13 დღით; გიგა მაქარაშვილს- 12 დღით; ელგუჯა ბაგრატიონს - 12 დღით; ზუკა ბერძენიშვილს- 7 დღით;  ლუკა ჭიჭინაძესა და  გიორგი ბუნტურს 5-5 დღით; დავით მჟავანაძესა და ირაკლი კაჭარავას  4- 4 დღით; დიმიტრი ბიძინაშვილს - 3 დღით პატიმრობა მიესაჯათ. მოსამართლემ გურამ მჭედლიშვილი 1000 ლარიანი ჯარიმით გაათავისუფლა, ხოლო პაატა სოსანაშვილს მხოლოდ სიტყვიერი შენიშვნა აკმარა.

სასამართლო დანარჩენი დაკავებულების საქმეების განხილვას ინდივიდუალურად აპირებს. თუ როდის გაიმართება პროცესი, ამ ეტაპზე ცნობილი არ არის.

18 ნოემბრის აქციის დაშლის დროს შინაგან საქმეთა სამინისტროს თანამშრომლებმა ადმინისტრაციული სამართალდარღვევისთვის 37 ადამიანი დააკავა. მათ სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას (სსკ-ის 173-ე მუხლი) და ხულიგნობას (166-ე მუხლი) ედავებიან.