საქართველოს პრემიერ-მინისტრი გიორგი გახარია მთავრობასთან მიმდინარე აქციას გამოეხმაურა. პრემიერმა მთავრობის სხდომაზე განაცხადა, რომ პოლიტიკური ოპონენტები ქვეყნის მნიშვნელოვან განზომილებას - ეკონომიკას არ ითვალისწინებენ და მის განვითარებას დესტრუქციული ქმედებებით ხელს უშლიან.
„ჩვენი ქვეყნის უახლოესი წლების განმავლობაში, ყველაზე დიდი გამოწვევაც და მიღწევაც, ეკონომიკური ზრდა და სამუშაო ადგილების შექმნა იქნება. ყველაფერი ის, რაც ხდება ჩვენს სოციალურ ან პოლიტიკურ ცხოვრებაში როგორც კი იძენს დესტაბილიზაციის ხასიათს, გადადის ქუჩაში და იძენს უკანონო ქმედებების სახეს, ზეგავლენას ახდენს ჩვენი ცხოვრების მნიშვნელოვან განზომილებაზე, როგორიც არის ეკონომიკური ცხოვრება. ამიტომ ის უპასუხისმგებლო პოლიტიკოსები, რომლებიც არ ითვალისწინებენ ჩვენი ქვეყნისთვის ყველაზე მნიშვნელოვან განზომილებას - ეკონომიკას, ჩვენ, როგორც პასუხისმგებლიანმა ძალამ გარკვეული ნაბიჯები უნდა გადავდგათ იმისთვის, რომ მსგავს გამოწვევებსაც გავცეთ შესაბამისი პასუხი," - განაცხადა გახარიამ.
