პრეზიდენტის გადაწყვეტილებით, შეწყალების კომისია დღეს ძველი შემადგენლობით შეიკრიბა. ამის შესახებ კომისიის თავჯდომარემ, ელენე თევდორაძემ განაცხადა. თუმცა, კომისიას 15 წევრი ჰყავს და ჯერჯერობით უცნობია, ვინ მიიღებს სხდომის დღევანდელ მუშაობაში   მონაწილეობას.

მისი თქმით, კომისიის შემადგენლობასთან დაკავშირებით პრეზიდენტის ბრძანება ახალი წლიდან შეიცვლება.  პატიმართა მორიგი შეწყალება 23 ნოემბერს იგეგმება.

ელენე თევდორაძის ცნობით, შეწყალების კომისია დღეს 1 400 პატიმრის საქმეს განიხილავს. მათი ნაწილი კომისიას საპატრიარქომ გადასცა. თუმცა, თევდორაძის თქმით, საპატრიარქოს სიას კომისია დროის უქონლობის გამო სრულად ვერ განიხილავს.

შეწყალების კომისიის თავმჯდომარის განმარტებით, დღეს ყველა ტიპის მსჯავრდებულების საქმე განიხილება. მისი თქმით, უცნობია, რამდენ პატიმარს შეიძლება შეეხოს შეწყალება. იმისთვის, რომ პატიმარს შეწყალება შეეხოს, მათ სასჯელის ნახევარი უნდა ჰქონდეთ მოხდილი და დადებითად ხასიათდებოდეს.

თევდორაძის ცნობით, სხვა პატიმრებთან ერთად დღეს 80 ქალი და 3 არასრულწლოვანი პატიმრის საქმე განიხილება.