პარლამენტის საშემოდგომო სესიის ბოლო სხდომაზე საზოგადოებრივი მაუწყებლის სამეთვალყურეო საბჭოს წევრები აირჩიეს.

15-წევრიან საბჭოში შვიდი ვაკანსია შეივსო. არჩეულ კანდიდატებს შორის "მედია კლუბის" სამი წევრი მოხვდა: ნინო დანელია - საქართველოს საზოგადოებრივ საქმეთა ინსტიტუტის პროგრამის კოორდინატორი და მედია მკვლევარი, ლიკა ჩახუნაშვილი - კავკასიის უნივერსიტეტის მედიის სკოლის დეკანი და "ლიბერალის" რედაქტორი შორენა შავერდაშვილი.

"მედია კლუბის" კანდიდატების გარდა, საბჭოს წევრები გახდნენ ქრისტიან-დემოკრატების მიერ წარდგენილი ნოდარ სარჯველაძე, დროებით უმუშევარი ემზარ გოგუაძე, "რუსთავი 2"-ის ყოფილი წამყვანი გიგა ნასარიძე და თავდაცვის სამინისტროს გაერთიანებული შტაბის ერთ-ერთი სამმართველოს კონსულტანტი ავთანდილ ანთიძე.

პრეზიდენტმა სულ 21 კანდიდატი წარადგინა. ისინი თითო ვაკანსიისთვის სამეულებად იყვნენ დაჯგუფებული. კენჭი ყველა კანდიდატს სათითაოდ ეყარა.