რა შეიძლება იყოს საზოგადოებრივი მაუწყებლის უნიკალობა და როგორ უნდა მოხდეს საბჭოს დეპოლიტიზაცია?

აქ არ არის პასუხები; პასუხები ერთად უნდა ვიპოვოთ

გუშინ მგონი პირველი დღე იყო, როცა ჩვენი შეკრება გასცდა ფორმალობას და ყველანი შევეცადეთ, რომ ყოველგვარი წინასწარგანწყობების გარეშე გვემუშავა.

ყველაზე მნიშვნელოვანი ისაა, რომ საბჭოს ყველა წევრი შეთანხმდა, რომ გვჭირდება ძალიან მკაფიო კონცეფცია საზოგადოებრივი მაუწყებლის თოთოეული სატელევიზიო არხისათვის და შევთანხმდით, რომ მომავალი კვირის დასაწყისში გვექნება კიდეც სამუშაო ტექსტი. ლევან გახელაძე ამ საკითხებზე საკუთარ ხედვას წარმოადგენს. პარალელურად, შეიქმნება მეორე მუშა ჯგუფი, რომელშიც შევა საბჭოს ყველა დაინტერესებული წევრი და ასევე, იმუშავებს მაუწყებლის კონცეფციაზე. ვფიქრობთ, რომ ეს ორი ტექსტი კარგი დასაწყისი იქნება ძირითად პრინციპებზე შესათანხმებლად. გვინდა მოვიფიქროთ, რითი შეიძლება საზოგადოებრივი მაუწყებლის პირველი არხი იყოს უნიკალური სატელევიზიო სივრცეში; რა იქნება ისეთი, რაც მაყურებელს გაუჩენს ამ არხის ყურების სურვილს; შევეცდებით, რომ რამდენიმე მიმართულება, რამდენიმე სფერო, რამდენიმე სეგმენტი მაინც განვსაზღვროთ და რაც ყველაზე მთავარია, ვაწარმოოთ განსაზღვრული კონცეფციისა თუ პროგრამული პრიორიტეტების შესრულების მონიტორინგი, მათი შეუსრულებლობის შემთხვევაში კი გენერალურ დირექტორს მათი დაცვა მოვთხოვოთ. უკვე წარმოვიდგინე სკეპტიკოსების რეაქცია მუშა ჯგუფების შექმნასთან დაკავშირებით. დაახლოებით ისეთი, საპარლამენტო კომისიის შექმნას რომ მოყვება ხოლმე - მუშაობის იმიტაციას რომ ნიშნავს ხშირად და არა რეალურ შედეგს. პასუხად მხოლოდ ის შემიძლია ვთქვა, რომ ორივე ტექსტი მზად იქნება 15 თებერვალს და მათი განხილვაც, შესაბამისად, შორს ვერ გადაიდება.

მეორე მნიშვნელოვანი საკითხი, ესაა საბჭოს წევრის არჩევის წესის განსაზღვრა. საჭიროა, ისეთი მექანიზმის მოფიქრება, რომელიც ხელს შეუწყობს საბჭოს დეპოლიტიზაციას, ანუ იმას, რომ საბჭოს წევრების შერჩევა არ იყოს დამოკიდებული პოლიტიკური პარტიების კვოტებზე, ან რაიმე სხვა ტიპის პოლიტიკურ შეთანხმებებზე. ამ საკითხის გადაწყვეტა მნიშვნელოვანია, რადგან მეტია იმის ალბათობა, რომ პოლიტიკურად დამოუკიდებელი საბჭო აირჩევს ასევე პოლიტიკურად დამოუკიდებელ დირექტორს, მხოლოდ მისი პროფესიონალიზმის საფუძველზე. რასაკვირველია, არასოდეს არის სრული გარანტია, მაგრამ ცხადია, რომ პოლიტიკურად დამოუკიდებელი საბჭო ნაკლებად მოექცევა პოლიტიკური კონიუნქტურის გავლენის ქვეშ და უფრო პროფესიული  გადაწყვეტილებების მიღებას შეძლებს.

კარგია, რომ მომავალ ორშაბათს ვგეგმავთ სემინარს BBC World Service Trust -თან, სადაც ამ საკითხებზე შეკითხვებიც გვექნება და მათ რეკომენდაციებსაც მოვისმენთ.

ასევე, ძალიან მნიშვნელოვანია, რომ ორივე საკითხზე დავიწყოთ საჯარო მსჯელობა და ამ დისკუსიაში მონაწილეობა აქტიურად მიიღოს სამოქალაქო სექტორმა, ყველამ, ვისაც მედიის თავისუფლებისა და პროფესიონალიზმის საკითხები აინტერესებს.

ვფიქრობ, რომ ახლა ყველაზე ნაკლებად გვჭირდება სკეფსისი, პირიქით, იქნებ ყველანი ჩავერთოთ ამ პროცესებში და რამე რიგიანი მოვიფიქროთ, რომ ყოველ წელს ველოსიპედის აღმოჩენა არ გვიწევდეს.

გარდა ამისა, ვილაპარაკეთ ეუტელსატის ცუდ საქციელზე და იმაზე, რომ "პერვი კავკაზსკის" სატელიტიდან გათიშვაში რუსეთის ხელი ურევია. ამას ანონიმურ დიპლომატზე დაყრდნობით, გაზეთი "ფიგაროს" 27 იანვრის ნომერიც იუწყება.

ჰო, კინაღამ დამავიწყდა, ბატონი ნოდარ სარჯველაძე წერს რაღაც დოკუმენტს, პირობითად, საბჭოს სხდომის რეგლამენტს. კარგად ვერ ვხვდები რაზე იქნება ეს დოკუმენტი, მაგრამ დიდი იმედი მაქვს, რომ არ იქნება ლაპარაკი ვის რამდენი კითხვის დასმის შესაძლებლობა აქვს სხდომის განმავლობაში ან რამდენჯერ შეუძლია კომენტარის გაკეთება. დანარჩენი კი ვნახოთ.