ჭადრაკის სასახლის 700-ადგილიანი დარბაზი დღის 3 საათისთვის მთლიანად შეივსო. სკამებს შორის ფეხზე დასადგომი ადგილიც აღარ დარჩა. დარბაზში ციოდა, ქურთუკი არავის გაუხდია და ალბათ ამიტომაც, სიტუაცია 90-იანი წლების საქართველოს უფრო წააგავდა, ვიდრე 2010 წელს - როცა მთავარი პოლიტიკური შეკრებები რუსთაველის გამზირზე რამდენიმე ფეშენებელური სასტუმროს დარბაზებში იმართება.

ოპოზიციონერი ლიდერების მისვლამდე აუდიტორიას ხალხით სავსე სცენიდან "საზოგადოებრივი დარბაზის" წევრები და აქტივისტები მიმართავდნენ. გამომსვლელთა უმრავლესობა ემოციურად ამტკიცებდა ხელისუფლების შეცვლის გარდაუვალობას. "ჩვენ აუცილებლად უნდა გავიმარჯვოთ!" "სააკაშვილის რეჟიმი უნდა დავამარცხოთ!" "ცოტაღა რჩება კოშმარის დასასრულამდე!" - ისმოდა შეძახილები აუდიტორიიდანაც.

შეკრების მთავარი მიზანი ახალი ოპოზიციური ერთობის დემონსტრირება იყო. ზურაბ ნოღაიდელი, ლევან გაჩეჩილაძე, ზვიად ძიძიგური, კობა დავითაშვილი და ირაკლი ალასანია შეთანხმდნენ, რომ 30 მაისის არჩევნებში ერთიანი კანდიდატი ეყოლებათ.

ერთმანეთის კონკურენტები რადიკალურად განსხვავებული პოლიტიკური იმიჯის და წარსულის მქონე პოლიტიკოსები არიან. ერთ მხარესაა ლევან გაჩეჩილაძე, რომლის ბრძოლის ველი საკნებით გადაჭედილი თბილისის  ქუჩებია; მეორე მხარეს  კი  ირაკლი ალასანიაა, რომელიც ქართულ ოპოზიციაში ნიუ-იორკის, გაერო-ს შტაბ-ბინის გაპრიალებული დერეფნებიდან მივიდა. განსხვავებით ალასანიასგან, რომელსაც უნდა, რომ ქართულ პოლიტიკაში მაღალი სტანდარტები შემოიტანოს, გაჩეჩილაძისთვის პოლიტიკაში ყოფნა ჰობია.

ლიდერის არჩევის გზა კონსულტაციების შედეგად უნდა გადაწყდეს. არჩევანი ასეთია: პრაიმერი, სოციოლოგიური კვლევა ან პოლიტიკური შეთანხმება. ჭადრაკის სასახლეში სამი პოლიტიკური პარტია და ლევან გაჩეჩილაძე შეკრებილთა წინაშე ახალი შენაძენით, ირაკლი ალასანიათი გამოჩნდნენ. ჭადრაკის სასახლეში ალასანია არა "ალიანსს", არამედ საკუთარ პარტიას წარმოადგენდა.

დარბაზში ამბობდნენ, რომ ალასანია გაბედული პოლიტიკოსია. "ნამდვილი გმირი", - ასე უწოდებდნენ მას. თუმცა, ტაშით დარბაზი სხვა დროს დაინგრა - როცა ტრიბუნასთან ზურაბ ნოღაიდელი გამოჩნდა, ამ გაერთიანების ნამდვილი ავტორი, "ედინაია როსიას" ქართველი პარტნიორი.

"ზურაბ ნოღაიდელს ვგულშემატკივრობ იმიტომ, რომ ჩემი ახლობელია. ჯერ კიდევ "მოქალაქეთა კავშირიდან" ვიცნობ და არა მგონია, რამე ცუდი გააკეთოს. მან შეძლო და ყველას გვერდით დადგა. ეს დასაფასებელია", -  სატელევიზიო კამერების წინ ამბობდა   მსახიობი გურანდა გაბუნია.

ზურაბ ნოღაიდელი არასაპარლამენტო ოპოზიციაში განხეთქილების მთავარი მიზეზი გახდა. ყოფილი პრემიერი გასული წლის შემოდგომიდან სათავეში ჩაუდგა ეგრეთ წოდებული "პრაიმერისტების" არაფორმალურ გაერთიანებას  -  კონსერვატორთა პარტიას (კახა კუკავა, ზვიად ძიძიგური) და ხალხის პარტიას (კობა დავითაშვილი). "ალიანსი საქართველოსთვის", რომელმაც პირველმა დაასახელა თბილისის მერობისა და საკრებულოს თავმჯდომარეობის საკუთარი კანდიდატები, პრაიმერში მონაწილეობას არ დათანხმდა.

ორივე მხარეს ჰქონდა შიდა ოპოზიციური პრაიმერის სასარგებლო და საწინააღმდეგო მყარი არგუმენტები.  "ალიანსი" მთავარ საფრთხეებს შიდა ოპოზიციური არჩევნების ჩატარების პროცესში ხედავდა და თვითმმართველობის არჩევნებამდე ერთი თვით ადრე ოპოზიციის ლიდერებს შორის წინა-საპრაიმერო კონკურენციას წამგებიან ნაბიჯად თვლიდა. პრაიმერის სანაცვლოდ, "ალიანსი" მათი კანდიდატისთვის მხარდაჭერის მოპოვებას პოლიტიკური შეთანხმების გზით ცდილობდა. არც კონსერვატორებმა,  არც დავითაშვილის პარტიამ და არც ზურაბ ნოღაიდელმა ირაკლი ალასანიას სასარგებლოდ გადაწყვეტილება არ შეცვალეს.

პარალელურად, ზურაბ ნოღაიდელი რამდენჯერმე ჩავიდა რუსეთის დედაქალაქში, პირადად შეხვდა პრემიერ პუტინს და მის პარტიასთან "ედინაია როსიასთან" ხელშეკრულების გაფორმებაც მოასწრო. მისი ამ კონტროვერსიული ნაბიჯების გამო, "პრაიმერისტებთან" ასოცირება "ალიანსისთვის" კიდევ უფრო არასასურველი გახდა. ამიტომაც, ყველა ელოდა, რომ არასაპარლამენტო ოპოზიციას არჩევნებში ორი ლიდერი წარმოადგენდა: ერთი - პრაიმერით გამოვლენილი, მეორე კი - ირაკლი ალასანია.

ორ ჯგუფს შორის არსებული, ერთი შეხედვით, მყარი ბალანსი მას შემდეგ დაირღვა, რაც წინასაარჩევნო მზადებაში მონაწილეობაზე თანხმობა აქამდე ბოიკოტის მომხრე ლევან გაჩეჩილაძემ განაცხადა.

გაჩეჩილაძე, რომელმაც 2008 წლის საპრეზიდენტო არჩევნებში თბილისში მიხეილ სააკაშვილს მოუგო, პოტენციურად მერობის ძლიერი კანდიდატია. ბოიკოტის რეჟიმიდან მისმა გამოსვლამ არასაპარლამენტო ოპოზიციის განლაგება შეცვალა.

რესპუბლიკელი დავით ბერძენიშვილი იხსენებს: "გაჩეჩილაძე ეძებდა მომენტს, სწავლობდა ირაკლი ალასანიას, მასთან მუდმივი ურთიერთობა ჰქონდა და ცდილობდა, პრაქტიკული ულტიმატუმებით დალაპარაკებოდა". სავარაუდოდ, ეს ულტიმატუმი "ალიანსიდან" ალასანიას წამოსვლას გულისხმობდა, რადგან არც პრაიმერში მონაწილეები და არც ლევან გაჩეჩილაძე ზურაბ ნოღაიდელს არ თმობდნენ, "ალიანსი" კი ყოფილ პრემიერთან თანამშრომლობაზე უარს ამბობდა.

დავით ბერძენიშვილი ვარაუდობს, რომ ალასანია ლევან გაჩეჩილაძის გავლენის ქვეშ მოექცა და "გაურკვეველ" გუნდში ამიტომაც აღმოჩნდა. "ირაკლი დაეჭვდა საკუთარ ლიდერობაში და პოლიტიკური შეცდომაც დაუშვა", - ამბობს ბერძენიშვილი. "ალიანსის" წევრები არ მალავენ, რომ ალასანია სხვადასხვა ოპოზიციურ ძალასთან შეხვედრებს მათ გარეშე მართავდა. თავად ალასანიამ, ზურაბ ნოღაიდელმა და ლევან გაჩეჩილაძემაც დაადასტურეს, რომ უკვე დიდი ხანია, ეს მოლაპარაკებები მიმდინარეობს. მაღალრეიტინგული ალასანიას გადაბირებას ყველა ცდილობდა.

„მე გადავდგი კეთილი ნების ნაბიჯი ერთიანობისკენ. დარწმუნებული ვარ, ისეთ გზას გამოვძებნით, რაც ყველა პოლიტიკური ძალისთვის მისაღები იქნება, მათ შორის - "ალიანსისთვისაც", - ამბობს ირაკლი ალასანია. ერთიანობის მისაღწევად ის ორმაგ თამაშს თამაშობს. ერთი მხრივ, ჭადრაკის დარბაზის სცენაზე ნოღაიდელთან ერთად გამოდის და მასთან მოლაპარაკებებს აწარმოებს, რითაც "ალიანსს" ემიჯნება, მეორე მხრივ კი, „ლიბერალთან" საუბარში ამბობს: "მე ზურაბ ნოღაიდელის გვერდით არ ვდგავარ, არ ვაპირებ არავისთან ახალ ბლოკში გაერთიანებას, "ალიანსი" არ დაშლილა".

თავად "ალიანსში" დაბნეულობა იგრძნობა. მართალია, ალასანიას აქ ისევ გუნდის წევრად თვლიან, მაგრამ ელოდებიან, რომ პარტნიორი შეცდომას გამოასწორებს. დავით ბერძენიშვილი თვლის, რომ მისი დაბრუნებისთვის კარი ყოველთვის ღიაა. ალასანიას დაბრუნებამდე "ალიანსში" შემდგომი ნაბიჯების გადადგმას არ ჩქარობენ, ალასანიას გარეშე პროგნოზები კი პესიმისტურია. "ალიანსს" ალასანიას გარეშე ისეთივე მაღალი რეიტინგი აღარ ექნება. თუ ალასანია მაინც ნოღაიდელის მოკავშირეობას დააპირებს, ვფიქრობ, რომ ისიც წააგებს. საბოლოოდ კი უგულავა გაიმარჯვებს", - ამბობს ბერძენიშვილი.

"ჩვენი საქართველო - თავისუფალი დემოკრატების" ლიდერს ოპოზიციურ კანდიდატებს შორის ყველაზე მაღალი რეიტინგი ჰქონდა. სოციოლოგიური კვლევების მიხედვით, მერობის მსურველებს შორის ირაკლი ალასანია სტაბილურ მეორე ადგილს იკავებდა გიგი უგულავას შემდეგ. არჩევნების მოახლოების მიუხედავად, "ალიანსს" წინასაარჩევნო კამპანია არ დაუწყია. ალასანია, როგორც ლიდერი და მერობის კანდიდატი, თითქმის არსად ჩანდა. სხვაობა პირველ და მეორე ადგილს შორის, კვლევების მიხედვით, არ იცვლებოდა. შესაძლოა, ალასანიამ საკუთარი სტაგნაციის მიზეზად "ალიანსთან" ასოცირება მიიჩნია და უფრო აქტიური პარტნიორების ძიება დაიწყო.

თუმცა, საეჭვოა, ახალი და ძალიან დაგვიანებული გაერთიანება მართლაც თბილისის მერის არჩევნების მოსაგებად იყოს შექმნილი. თუ ახალი პარტნიორებისგან ირაკლი ალასანია დახმარებას წინასაარჩევნო კამპანიის ეფექტურად წარმართვაში ელის, ის ან ძალიან მიამიტია, ან სრულიად გაუთვითცნობიერებელი ქართულ პოლიტიკაში.

ზურაბ ნოღაიდელის წინასაარჩევნო რიტორიკა ბოლო დროს ხმების დაცვის მიზნით გამყალბებლებისთვის "ხელების დამტვრევით" და "პოლიტიკური ნეკროლოგების" შედგენის მუქარითაა გაჯერებული. ლევან გაჩეჩილაძემ კი ჯერ კიდევ იანვარში ახსენა პროტესტის "მესამე ტალღა", რომელიც არჩევნების შემდეგ აგორდება. "მერის არჩევნები იქნება ძალიან დიდი მღელვარების დაწყების საბაბი. სააკაშვილის ნატურა არის ასეთი - არაფერს არ გაძლევს, რაც არ უნდა სამართლიანად მოიპოვო. გამოწერს ისეთ ქაღალდს, რომელიც საქართველოს ინტერესების და ქართველი ამომრჩევლის წინააღმდეგ იმუშავებს. მაგრამ ჩვენი ამომრჩეველი ამას ძალიან ადეკვატურ რეაქციას მისცემს", - ამბობდა მაშინ გაჩეჩილაძე.

იგივე განწყობა აქვთ გაჩეჩილაძის ტრადიციულ მხარდამჭერებს - ორგანიზაცია "ქართული აკადემიის" წევრებს, ცნობილ მსახიობებსა და მწერლებს: "არჩევნების გაყალბების შემდეგ ჩვენ მოვახდენთ პარტიულ ორგანიზებას. ყველას ვაჩვენებთ, რომ შეგვიძლია ჩვენი ხმების დაცვა", - ამბობს აკადემიის წევრი ნუკრი ქანთარია.

"ხელისუფლება ადგილობრივ არჩევნებს გააყალბებს და ამას მთელი მსოფლიო დაინახავს. ამ გაყალბებას ქვეყანაში სერიოზული ჭექა-ქუხილი უნდა მოჰყვეს", -  განაცხადა გიორგი გაჩეჩილაძემ ერთ-ერთი შეხვედრის შემდეგ.

"გაყალბება გამოგონილი მითია, ქაოსის ასატეხად. ხელისუფლება ისედაც დიდი ანგარიშით იგებს, მით უმეტეს, როცა ოპოზიციაში ქაოსია", - ამბობს პოლიტოლოგი ანდრო ბარნოვი.

ეგრეთ წოდებული "პრაიმერისტებიდან" არც ერთი პოლიტიკური სუბიექტი, "ალიანსისგან" განსხვავებით, არ მონაწილეობს საარჩევნო სიების კორექციის პროცესში. სიების გადამოწმებით ოპოზიციურ პარტიებს შეეძლოთ ხელისუფლების მხრიდან არჩევნების გაყალბების შანსები შეემცირებინათ, თუ ეს მათი მიზანი იყო.

თავად ალასანია ყოველგვარ არეულობას გამორიცხავს. გაყალბების შემთხვევაში, ის ამომრჩეველთა ხმების დაცვას სამართლებრივი გზებით და საერთაშორისო თანამეგობრობის აქტიური ჩართვით აპირებს.

ოპოზიციის ლიდერებთან დაახლოებული წყარო "ლიბერალთან" საუბარში განმარტავს, რომ ახალ გაერთიანებას ირაკლი ალასანია მხოლოდ იმისთვის სჭირდება, რომ არჩევნებში უგულავას მაქსიმალურად ძლიერი კანდიდატი დაუპირისპიროს, მცირე სხვაობით წაგების შემდეგ კი "ხმების დაცვის" ლეგიტიმური მოტივი მოიპოვოს და ქუჩის აქციები დაიწყოს. ამავე წყაროს ცნობით, "მესამე ტალღისთვის" საჭირო ფინანსებს ახალ გაერთიანებას ზურაბ ნოღაიდელი და ირაკლი ოქრუაშვილი ჰპირდებიან. არც ერთი მათგანის ამბიცია თბილისის მერის არჩევნების მოგება არ არის.