ხახუტაშვილმა მიწის ნაკვეთის საფასური წერილობითი შეტყობინების მიღებიდან ერთ თვეში გადაიხადა, რის გამოც, მიწის პრივატიზების წესის შესახებ კანონის თანახმად, მას საფასური გაუნახევრდა.

2008 წლის 24 აპრილს სოლომონ ხახუტაშვილმა მიწის ნაკვეთი საკუთრებად დაირეგისტრირა.

ხახუტაშვილები ამ ნაკვეთს აუქციონის წესით შესყიდვამდეც ფლობდნენ, ოღონდ იჯარით.

სოლომონ ხახუტაშვილსა და ყვარლის რაიონის გამგეობას შორის 2000 წელს დადებული იჯარის ხელშეკრულება პირველად 2008 წლის იანვარში გახდა სადავო.

საქმის მასალების მიხედვით, მუნიციპალიტეტის გამგეობამ ხახუტაშვილთან დადებული საიჯარო ხელშეკრულება გადასახადის გადაუხდელობის მიზეზით გააუქმა, რაც ხახუტაშვილმა რაიონულ სასამართლოში გაასაჩივრა. სასამართლოს მთავარ სხდომაზე ხახუტაშვილმა გადასახადის სრულად გადახდის დამადასტურებელი დოკუმენტაცია წარადგინა. მოსამართლე ოლია სეფიაშვილმა 2008 წლის 15 იანვრის გადაწყვეტილებით, ხახუტაშვილის სარჩელი დააკმაყოფილა და მიწის ნაკვეთი მის სარგებლობაში დააბრუნა. მხარეებს სასამართლოს გადაწყვეტილება არ გაუსაჩივრებიათ და ის კანონიერ ძალაშია შესული.

მიწის ნაკვეთთან დაკავშირებით ხახუტაშვილებს პრობლემა მეორედ 2009 წლის დეკემბერში შეექმნათ.

"2009 წლის 24 დეკემბერს სახლში სოფლის გამგებელმა რამაზ ლამაზოშვილმა მოგვაკითხა.  გვითხრა, - ყვარლის მუნიციპალიტეტის საკრებულოს თავმჯდომარის მოადგილე ზაზა ლომიძე გიბარებთო. საკრებულოში მე და ჩემი მეუღლე წავედით. ლომიძემ მიგვითითა, რომ მიწა, რომელიც 2008 წელს ვიყიდეთ, უსასყიდლოდ უნდა დაგვეთმო. თუ არ დათმობთ, მაინც წაგართმევენ და დავას თუ დაიწყებთ, რაც გირგვლიანის ოჯახს დამართეს, იგივე დაგემართებათო. საკრებულოს თავმჯდომარის მოადგილეს ვკითხეთ,  თუ ვინ იყო მიწის ნაკვეთით დაინტერესებული, რომ მას მოვლაპარაკებოდით. ლომიძემ დაინტერესებული პირის ვინაობა არ გვითხრა. ჩვენ კი მიწის უსასყიდლოდ დათმობაზე უარი ვთქვით", - აღნიშნავს სოლომონ ხახუტაშვილის მეუღლე მანანა ხახუტაშვილი.

ზაზა ლომიძე, ყვარლის მუნიციპალიტეტის საკრებულოს თავმჯდომარის მოადგილე: "ნეკრესისა და ჰერეთის ეპისკოპოსთან ახლო ურთიერთობა მაქვს. მეუფე სერგიმ მითხრა, - ნეკრესის შესასვლელთან მდებარე ნაკვეთი ეპარქიას სჭირდებაო. მონასტრის შესასვლელში მუზეუმის, ავტოსადგომის, სატრაპეზოს მშენებლობაა დაგეგმილი და ეს ადგილი ამისთვის გვინდაო. მეც დავიბარე ხახუტაშვილები და ვთხოვე, რომ ნაკვეთი დაეთმოთ, რაზეც უარი თქვეს. მე მათ არ დავმუქრებივარ".

მას შემდეგ, რაც ხახუტაშვილებმა საკრებულოს თავმჯდომარის მოადგილეს მიწის ნაკვეთის დათმობაზე უარი უთხრეს, მათ ყვარლის მუნიციპალიტეტის გამგებელი ლევან გამსახურდია შეხვდათ. "გამგებელმა შემოგვითვალა, - ეგ მიწა დათმეთ და ნაკვეთს სადმე სხვაგან მოგცემთო. ქალიშვილის დასაქმებასაც დაგვპირდა, მაგრამ არ დავთანხმდით", - ჰყვება მანანა ხახუტაშვილი.

ლევან გამსახურდია, ყვარლის მუნიციპალიტეტის გამგებელი: "ეკლესიას უნდოდა ეგ ნაკვეთი. ტურიზმი უნდა განვითარდეს. ხახუტაშვილებს მართლაც ვუთხარი, რომ ნეკრესის შესასვლელთან მდებარე ნაკვეთის დათმობის სანაცვლოდ, მიწის ფართობს სხვაგან გამოვუძებნიდი, მაგრამ იუარეს. მათ მეტად აღარ შევხვედრივარ".

ნეკრესისა და ჰერეთის ეპისკოპოსმა სერგიმ (ჩეკურიშვილი) ჩვენთან საუბარში დაადასტურა, რომ სოლომონ ხახუტაშვილის საკუთრებაში არსებული მიწის ნაკვეთით ნამდვილად ეპარქია იყო დაინტერესებული. მეუფეს თქმით, ნაკვეთის გადაცემის სანაცვლოდ, ხახუტაშვილს ის გარკვეულ თანხასაც სთავაზობდა, თუმცა ფასზე ვერ შეთანხმდნენ.

ამის შემდეგ საქმეში კახეთის საოლქო პროკურატურა ჩაერთო.

სოლომონ ხახუტაშვილი: "2010 წლის 8 იანვარს კახეთის საოლქო პროკურატურაში დაგვიბარეს. პროკურორის პირველი მოადგილე ვაჟა მაღრაძე და გამომძიებელი ილია ჯანგულაშვილი შეგვხვდნენ. მაღრაძემ ფასი გვკითხა. ვუთხარით, რომ ნაკვეთს 10 000 დოლარად გავყიდდით. მიწის ნაკვეთი 45 ლარად იყიდეთ და 10 000 დოლარად გაყიდვა გინდათ? თქვენთან ლაპარაკი არ შეიძლება, ამ საქმეს ჩვენ მივხედავთო", - გვითხრა მაღრაძემ".

2010 წლის 11 იანვარს კახეთის საოლქო პროკურატურაში სისხლის სამართლის საქმე აღიძრა. საქართველოს პროკურატურის ინფორმაციით, სახელმწიფო ქონების აღრიცხვისა და პრივატიზების კახეთის სამხარეო სამმართველოს მუშაკების მიმართ გამოძიება მათ მიერ ჩადენილი დანაშაულის ნიშნების გამოკვეთით დაიწყო. ოფიციალური ცნობით, საქმის აღძვრას საფუძვლად ოპერატიული ინფორმაცია დაედო.

"სოლომონ ხახუტაშვილმა ყვარლის რაიონის სოფელ შილდის ტერიტორიაზე 2008 წლის 17 აპრილს სახელმწიფო ქონების აღრიცხვისა და პრივატიზების კახეთის სამმართველოს მეშვეობით შეიძინა ერთი ჰექტარი მიწის ნაკვეთი (საძოვარი) 45 ლარად. როგორც გამოძიებით დადგინდა, 2000 წლის 10 ნოემბრით დათარიღებული ხელშეკრულება, რომლის თანახმადაც, სოლომონ ხახუტაშვილი ზემოაღნიშნულ მიწის ნაკვეთს ფლობდა, უკანონოა და კანონმდებლობის უხეში დარღვევით არის გაფორმებული; კერძოდ, იმ დროისთვის მოქმედი კანონმდებლობის თანახმად, მას შემდეგ რაც მიწის იჯარით გამცემი მუდმივმოქმედი კომისია განიხილავდა მოქალაქეზე მიწის ნაკვეთის იჯარით გადაცემის საკითხს, აღნიშნული გადაწყვეტილება სხდომაზე რაიონულ გამგეობას უნდა დაემტკიცებინა და  მოქალაქესთან მხოლოდ ამის შემდეგ უნდა გაფორმებულიყო ხელშეკრულება მიწის ნაკვეთის იჯარით გადაცემის შესახებ. ამ შემთხვევაში, კანონის ეს მოთხოვნა უხეშად დაირღვა - რაიონულმა გამგეობამ ხახუტაშვილისთვის მიწის ნაკვეთის იჯარით გადაცემის საკითხი 2000 წლის 16 ნოემბერს განიხილა, მაშინ, როდესაც 2000 წლის 10 ნოემბერს, ანუ 6 დღით ადრე, მასთან უკვე გაფორმებული იყო უკანონო ხელშეკრულება.