,,არ გაძლევთ სასამართლო პროცესის აუდიო ჩანაწერის გაკეთების უფლებას." - მითხრა მკაცრი ხმით სააპელაციო სასამართლოს მოსამართლე დიტო ჭედლიშვილმა და მანდატურს ჩემთვის დიქტოფონის ჩამორთმევის ბრძანება მისცა.
დარბაზში განსასჯელი პავლე ბლიაძე შემოიყვანეს, შემინულ კაბინაში მოათავსეს და პროცესი დაიწყო. განსასჯელს ,,ბაიკალის" ტიპის პისტოლეტის უკანონო ტარება და შენახვა ედება ბრალად.
სამმა მოსამართლემ, პროკურორმა მიხეილ ბერიკაშვილმა და ბლიაძის 30-ამდე გულშემატკივარმა ჩუმად, უკვე მერამდენედ მოისმინეს პავლე ბლიაძის საჯარო განცხადება იმის შესახებ, რომ მას რუსეთის ჯაშუშობის დაბრალებას სთავაზობდნენ. უარის თქმიდან ერთი თვის შემდეგ კი იარაღის უკანონო ტარების ბრალდებით დააკავეს. მსჯავრდებულის განცხადებით, საქმეში ნივთმტკიცებად მითითებული იარაღი მას არასოდეს უტარებია და სწორედ ამიტომ ვერ იპოვა სასამართლო ექპსერტიზამ ზედ მისი თითის ანაბეჭდები.
,,როცა იარაღის ტარების ბრალდებით დამაკავეს, მერვე საპყრობილეში მომაკითხეს ვინმე გიორგიმ და ლერიმ და გათავისუფლების სანაცვლოდ, კამერებთან რუსეთის ჯაშუშობის დაბრალება შემომთავაზეს."
თავიდან მოსამართლეები ბლიაძის მონაყოლის დეტალებით დაინტერესდნენ, მაგრამ მოგვიანებით, მოსამართლე დიტო ჭედლიშვილმა მოკლედ მოჭრა: ,,თქვენი მონაყოლი საქმის წარმოდეგნილ მასალებში არ შედის და რადგან ჩვენი მოვალეობაა არა ობოექტური ჭეშმარიტების, არამედ წარმოდგენილი მასალებზე დაყრდნობით ჭეშმარიტების დადეგნაა, საქმის არსობრივ განხივალზე გადავიდეთ".
დაიწყო მხარეების კამათი.
,,იმის გასარკვევად, ჰქონდა თუ არა განსასჯელს ტანსაცმელზე ამოღებული იარაღის მიკრო ნაწილაკები, ექსპერტიზა გამოძიებამ იმიტომ არ ჩაატარა, რომ ეგონა იარაღზე იქნებოდა თითის ანაბეჭდები. მანქანა და განსასჯელის შვილი კი იმიტომ არ გაჩხრიკეს, რომ ოპერატიული ინფორმაცია მხოლოდ ბლიაძეზე მიუთითებდა. მოგვიანებით, დაკავებულის სახლიდან კომპიუტერი დამატებითი მტკიცებულების პოვნის მოტივით წაიღეს და ამას ჯაშუშობათან კავშირი არ ჰქონია" - უთხრა სასამართლოს პროკურორმა მიხეილ ბერიკაშვილმა.
დაცვის მხარის კითხვაზე - ,,რატომ არ ჩაატარეს მიკრონაწილაკების ექსპერტიზა მას შემდეგ, რაც იარაღზე თითის ანაბეჭდები არ აღმოჩნდა? ან რა ლოგიკით გაჩხრიკეს სახლი და კომპიუტერი, როცა არ შეუმოწმებიათ ის მანქანა, რითაც განსასჯელი დაკავებამდე გადაადგილდებოდა?" პროკურორს აღარ უპასუხია.
ოთახში სიტუაცია დაიძაბა, ჰაერი ჩაიხუთა და დაცხა. პროკურორი და დამსწრეების ნაწილი მოდუნდა და თვალების სრესა დაიწყო. მანდატურმა მეტალოპლასმასის ფანჯარა გახსნა და გრილი ჰაერი შემოუშვა.
ადვოკატებმა დავით მესხმა და გელა ნიკოლეიშვილმა მოსამართლეებს სთხოვეს, ეხელმძღვანელა იმ პრინციპით, რომ პიროვნების ბრალის დამადასტურებელი უტყუარი მტკიცებულებები პროკურატურამ უნდა წარმოადგინოს. ამ შემთხვევაში კი პროკურატურას მტკიცებულებად მხოლოდ ორი მოტივირებული შსს-ს თანამშრომლების ჩვენება აქვთ.
სააპელაციო სასამართლოს წინა სხდომაზე მოსამართლემ არ დააკმაყოფილა ადვოკატების შუამდგომლობა ბლიაძის მეზობლების დაკითხვასთან დაკავშირებით. ამ ადამიანებმა მსჯავრდებული სახლიდან გასვლისას, მანქანაში ჩაჯდომამდე რამდენიმე წუთით ადრე ნახეს და ამბობენ, რომ ამ დროს პავლე ბლიაძეს იარაღი თან არ ჰქონია. მოსამართლის განცხდებით, მათი ეს ჩვენება არ გამორიცხავს, რომ მსჯავრდებულს დაკავების დროსაც არ ექნებოდა ,,ბაიკალი” - შეეძლო გზაში, ან მანქნაში აეღო (თუმცა გამოძიებას თავად მანქანა არ გაუჩხრეკავს).
საბოლოო გადაწყვეტილების მისაღებად მოსამართლეები სათათბიროდ გავიდნენ და 15 წუთის შემდეგ დაბრუნდნენ: ,,ძალაში დარჩეს საქალაქო სასამართლოს განაჩენი, რომელიც პავლე ბლიაძეს იარაღის უკანონო ტარებასა და შენახვაში დებს ბრალს. სასჯელის ზომად განესაზღვროს 5 წელი. გადაწყვეტილება შეიძება გასაჩივრდეს 1 თვის ვადაში უზენაეს სასამართლოში. სხდომა დასრულებულია"
პავლე ბლიაძის ოჯახის წევრები ამბობენ, რომ ამ გადაწყვეტილებასაც აუცილებლად გაასაჩივრებენ, თუმცა, როგორც ამბობენ, სასამართლოს ობიექტური გადაწყვეტილების იმედი არ აქვთ.
პავლე ბლიაძის საქმის ვრცელი ჟურნალისტური გამოძიება წაიკითხეთ ლიბერალის 19 აპრილის, 27-ე ნომერში.
ახალი კომენტარის გამოქვეყნება