4 ნოემბერს გორის რაიონის სოფელ ტირძნისში მცხოვრები 4 არასრულწლოვანი დაიკარგა. ტირძნისის საშუალო სკოლის მოსწავლეები -  17 წლის ლევან ხმიადაშვილი, 16 წლის ვიქტორ ბუჩუკური, 14 წლის გიორგი რომელაშვილი და ალეკო ცაბაძე ცხინვალის შსს-ს თანამშრომლებმა დააკავეს.

ცხინვალის ტელევიზიამ დაკავებული არასრულწლოვნების დაკითხვის ამსახველი ვიდეომასალა გამოაქვეყნა. კადრებიდან ჩანს, რომ მოზარდები საზღვრის უკანონოდ გადაკვეთას აღიარებენ. მათი განცხადებით, ისინი გიორგი რომელაშვილის სახლის სანახავად მიდიოდნენ. სამხრეთ ოსეთის შსს მინისტრის, ვიტალი გასინის ცნობით, მოზარდებმა დაკითხვისას დანაშაული აღიარეს და სამართალდამცავებს ის ადგილი უჩვენეს, სადაც ასაფეთქებელი ნივთიერებები შეინახეს. არასრულწლოვანებს საზღვრის უკანონოდ გადაკვეთა და ტერაქტის დაგეგმვა ბრალდებათ. გიორგი რომელაშვილს კი ცხინვალის რაიონის სოფელ ხეთის მცხოვრების გაქურდვას აბრალებენ. ცხინვალის ტელევიზიის მიერ გავრცელებულ მასალაში ჩანს, რომ ეს პიროვნება რომელაშვილს ადანაშაულებს.

ქართული მხარე დაკავებულების უპირობო გათავისუფლებას ითხოვს. საგარეო საქმეთა სამინისტრო ამ მოთხოვნით რუსეთს მიმართავს. სამინისტროსა და პარლამენტში ამ მოვლენას პროვოკაციად აფასებენ.

მოზარდების საქმე სამხრეთ ოსეთის პროკურატურას გადასცეს. ქართველი არასრულწლოვნები სასამართლოს წინაშე უნდა წარდგნენ. თუმცა, განხილვის ზუსტი თარიღი ცნობილი არ არის.