მხოლოდ სტუდენტებს შესწევთ ძალა, მანკიერებებისგან გაწმინდონ ეს ქვეყანა _ ილიას სახელმწიფო უნივერსიტეტის ლექტორმა, გიორგი მაისურაძემ, 11 მარტს „აუდიტორია 115-ის“ სტუდენტებს თბილისის სახელმწიფო უნივერსიტეტის შენობაში მიმართა. სტუდენტური პროტესტი, რომელიც სტუდენტური თვითმმართველობის მიერ თანხის არამიზნობრივ ხარჯვას და კანცლერის კანდიდატად გიორგი გაფრინდაშვილის წარდგენას უკავშირდებოდა, ნელ-ნელა სისტემური ცვლილებების მოთხოვნისკენ გადაიხარა.
„ავტონომია უნივერსიტეტს“, „აკადემიური თავისუფლება უნივერსიტეტს“, _ ამ წარწერებით და შეძახილებით სტუდენტები ცდილობდნენ, ეთქვათ, რომ მათი მიზანი არა კონკრეტული პირების წინააღმდეგ ბრძოლა, არამედ სისტემის ნგრევაა.
შემდეგ იყო „აუდიტორია 115“. ალბათ, საქართველოში ერთ-ერთი დიდი სტუდენტური პროტესტის სიმბოლო. აუდიტორია, რომლის დაფაზეც რამდენიმე დღე სტუდენტების სახელები და გვარი მონაცვლეობდა, სტუდენტების, რომლებიც აქ ღამეს ათევდნენ და ერთმანეთს მხარს უმაგრებდნენ.
15 მარტს „აუდიტორია 115-ის“ სტუდენტების აქციის პარალელურად, თსუ-ის ეზოში თვითმმართველობის მიერ ორგანიზებულ კონტრაქციაზე უნივერსიტეტის რექტორის, ვლადიმერ პაპავას გადადგომა მოითხოვეს. ამის შემდეგ რამდენიმე დღე შენობა აუდიტორიის წევრების გარდა, თვითმმართველობასა და მათ მხარდამჭერებს ჰქონდათ დაკავებული.
სტუდენტური მოძრაობის აქციები 16 მარტის ღამეს, „მანიფესტი 115-ის“ საჯარო კითხვით, თსუ-ის ეზოში დასრულდა:
„ყველა სტუდენტი და პროფესორი თანასწორია!“
ავტონომია უნივერსიტეტს
„აუდიტორია115“
„ჩვენი ბრძოლა ამით არ სრულდება, ეს დიდი სტუდენტური მოძრაობისა და მნიშვნელოვანი ცვლილებების დასაწყისია“.
სტუდენტები სისტემის წინააღმდეგ დღესაც განაგრძობენ ბრძოლას. „აუდიტორია 115“ კი, ალბათ, მნიშვნელოვანი ცვლილებების სიმბოლო გახდება.
