წელს ლგბტქი თემის წარმომადგენლებმა და მათმა მხარდამჭერებმა 17 მაისის, ჰომოფობიასა და ტრანსფობიასთან ბრძოლის საერთაშორისო დღის აღნიშვნა, სპეციალურად, მათთვის შემოსაზღვრულ ადგილზე, კანცელარიის წინ მოახერხეს. მანამდე მოქალაქეები თბილისის ორ ლოკაციაზე შეიკრიბნენ და კანცელარიამდე სამარშრუტო ტაქსით, პოლიციის თანხლებით მივიდნენ.
კანცელარიამდე მისასვლელი ყველა გზა დილიდან გადაკეტილი იყო. პოლიციის გარდა, ლეონიძის ქუჩის კუთხეში სპეცრაზმის წარმომადგენლებიც იმყოფებოდნენ.
„ჩვენ ვითხოვთ თანასწორობას", „ვდგავარ მათთვის, ვისაც აქ დგომა არ შეუძლია", „5 ტრანსგენდერ ქალს სასტიკად სცემეს" , - ამ და სხვა ტრანსპარანტებით ხელში, აქციის მონაწილეები კანცელარიის შენობის წინ, პოლიციასთან ერთად დაახლოებით ერთი საათის განმავლობაში იმყოფებოდნენ.
მიუხედავად იმისა, რომ შინაგან საქმეთა სამინისტრომ დღეს შეძლო, აქცია მშვიდობიან რეჟიმში გამართულიყო, EMC-ის წარმომადგენელი, ლიკა ჯალაღანია ამბობს, რომ სახელმწიფომ აქციის მონაწილეებს ამის საშუალება ძალიან მკაცრ და ლიმიტირებულ პირობებში მისცა, ამიტომ ეს გამოხატვისა და შეკრების თავისუფლების უფლების რეალიზებად არ შეიძლება მივიჩნიოთ:
კონტრაქციის წევრებმა - სასულიერო პირებმა და მრევლის ნაწილმა, რომლებიც ფილარმონიასთან ოჯახის სიწმინდის დაცვის დღეს აღნიშნავდნენ, შემდეგ კანცელარიასთან გადაინაცვლეს. პოლიციამ ისინი კანცელარიის ტერიტორიაზე არ შეუშვა.
ჰომოფობიასა და ტრანსფობიასთან ბრძოლის საერთაშორისო დღის აღნიშვნა აქციის მონაწილეებმა ერთ საათში დაასრულეს; უკან პოლიციის დახმარებით სამარშრუტო ტაქსით დაბრუნდნენ.
