Search
"ლიბერალი" მისამართი: თბილისი, რუსთაველის 50 ტელეფონი: +995 32 2470246 ელ. ფოსტა: [email protected] Facebook: https://www.facebook.com/liberalimagazine
გაგზავნა
გაგზავნა

ვიდეო ► ნიკა ჩერქეზიშვილის პროტესტი კანცელარიასთან - დამიბრუნონ, რაც უკანონოდ წამართვეს

12 დეკემბერი 2016

პოეტი ნიკა ჩერქეზიშვილი მეორე დღეა კანცელარიასთან სამსახურიდან გათავისუფლებას აპროტესტებს. ნიკა 2015 წლის 30 ოქტომბერამდე, საგარეო საქმეთა სამინისტროს სახელმწიფო შესყიდვების უზრუნველყოფის სამსახურის უფროსად, 6 თვის გამოსაცდელი ვადით მუშაობდა. 30 ოქტომბერს ნიკა გაათავისუფლეს და ამის მიზეზად დაუსახელეს, რომ არის არაკომპეტენტური და კონფლიქტური კადრი. ნიკა ამბობს, რომ ამ 6 თვის განმავლობაში არც ერთი შენიშვნა არ მიუღია, ამიტომ მისი გათავისუფლება სრულიად უსამართლო და დაუსაბუთებელი იყო.

ნიკა ჩერქეზიშვილმა სასამართლოს ერთი წლის წინ მიმართა. სასამართლომ მისი სარჩელი არ დააკმაყოფილა. ამიტომ, მან პროტესტის სხვა გზას მიმართა:

"სასამართლოს დასკვნა ჯერ არ ჩამბარებია. თუმცა, ვაპირებ რომ უზენაესში გავაპროტესტო გადაწყვეტილება. სამსახურიდან სრულიად უსაფუძვლოდ გამათავისუფლეს. მყავს ავადმყოფი მშობლები, მცირეწლოვანი შვილი და ბანკიდან გამოტანილი მაქვს კრედიტი. ამ ერთი წლის განმავლობაში გავიარე დაახლოებით 50 კონკურსი, სადაც უმაღლესი ქულები მივიღე, თუმცა იმის გამო, რომ პირადი საქმე გამიფუჭდა და ახლა ყველას არაკომპეტენტური და კონფლიქტური პიროვნება ვგონივარ, ჩემს აყვანაზე უარს ამბობენ", - ამბობს ნიკა. 

მან წუხელ კანცელარიის წინ გაატარა ღამე. ამბობს, რომ სანამ სამსახურში არ აღადგენენ, პროტესტს არ შეწყვეტს. 12 ოქტომბერს, 7 საათზე ნიკას სოლიდარობისთვის მთავრობის კანცელარიასთან აქციაა დაგეგმილი. ნიკას "თბილისის სოლიდარობის ქსელი" ეხმარება. 

"პოეტი ნიკა ჩერქეზიშვილი კიდევ ერთი მაგალიათია იმ დაუსრულებელი უსამართლობის,რასაც მუდმივად აწყდებიან დასაქმებული ადამიანები. იგი უკანონად გაათავისუფლეს სამსახურიდან. ნიკა ჩერქეზიშვილი, რომელსაც საკუთარი სპეციალობით მუშაობის თორმეტწლიანი გამოცდილება აქვს, მუშაობდა საგარეო საქმეთა სამინისტროში სახელმწიფო შესყიდვების სამსახურის ხელმძღვანელად და უსაფუძვლად იქნა გაშვებული სამსახურიდან. მას აქვს სამი მოთხოვნა:

1. აღადგინონ ნიკა ჩერქეზიშვილი საგარეო საქმეთა სამინისტროს სახელმწიფო შესყიდვების უზრუნველყოფის სამსახურის უფროსად!

2. შეხვდეს გიორგი კვირიკაშვილი, რომელსაც ნიკას გათავისუფლების დროს ეკავა საგარეო საქმეთა მინისტრის თანამდებობა!

3. საჯარო სამსახურებში კადრებს ნიშნავდნენ უფრო სამართლიანად და გამჭვირვალედ. პრიორიტეტი გახდეს კვალიფიკაცია და არა ნეპოტიზმი!

ნიკა 11 დეკემბრიდან ღამეს ათენებს კანცელარიის წინ და იმდენ ხანს დარჩება იქ, სანამ მისი მოთხოვნები არ შესრულდება. გამოუცხადეთ ნიკას სოლიდარობა", - წერია "თბილისის სოლიდარობის ქსელის" მიერ გავრცელებულ განცხადებაში.

ნიკა ჩერქეზიშვილმა პროტესტის დაწყებამდე საკუთარ ფეისბუქ გვერდზე სტატუსი გამოაქვეყნა, რომელსაც უცვლელად გთავაზობთ:

შესაძლოა, დაიბადო გეტოში, ქალაქის ერთ-ერთ ღარიბ გარეუბანში და თითქმის მთელი ბავშვობის, მოსწავლეობისა და სტუდენტობის პერიოდი გაატარო ისეთ ირობებში, მუყაოს ყუთში ცხოვრებაზე უკეთესი რომ არ არის.

გეძინოს იატაკზე და ფეხმორყეული სკამი გიწევდეს მაგიდის მაგივრობას. ელექტროენერგია არ გქონდეს და ლამპის შუქზე გადიოდეს ღამეები, მინების ნაცვლად წებოვანი სკოჩი გქონდეს გაკრული ფანჯრებზე და კიდევ ათასი მსგავსი რამ...

აი, ამ სიღატაკეში, გაჭირვებასა და გარშემო არსებულ ძალიან დამთრგუნველ პირობებში შეძლო და ისწავლო ისე, რომ წარმატებით დაამთავრო სკოლაც და უნივესიტეტიც. გარემოში, სადაც ღრმა ბავშვობიდან კრიმინალობა უნდა ყველა ბიჭს. სადაც ყოველდღე გიწევს იჩხუბო ან შეურაცხყოფა მოითმინო მხოლოდ იმისთვის, რომ სწავლობ და ეს ამ გარემოსთვის მიუღებელია, ე.წ. შკოლნიკობაა და ა.შ.

გაუძლო იმასაც, რომ თურმე უკვე თავის ტვინში სიმსივნეჩაბუდებული დედაშენი საშინლად წვალობს, რათა შენ უნივერსიტეტში წასასვლელი ფული გქონდეს. უნივერსიტეტში, სადაც უფულობის გამო, როცა დედა ავად იყო და ვერ ახერხებდა მუშაობას, ნახალოვკიდან მაღლივ კორპუსამდე უამრავჯერ ასულხარ ფეხით. სადაც სტუდენტობისას, სწავლის პარალელურად, ოჯახის დასახმარებლად მუშაობ მტვირთავად ტუშონკების ცეხში, ზელ ბეტონს სხვადასხვა სამშენებლო ობიექტზე, ეზიდები თორმეტკილოგრამიან ბლოკებს, ტეხ ღამეებს სტაიანჩიკად მუშაობისას, დილით კი დაღლილი და გამოუძინებელი მიდიხარ უნივერსიტეტში.

შემდეგ გაივლი ასობით კონკურსს, სადაც თითქმის ყველგან გადალახავ ტესტირების საფეხურს, მაგრამ იქ გხვდება დიდი ბუა - გასაუბრება და ნეპოტიზმით დაავადებულ ქვეყანაში, დასაქმების არანაირი შანსი არ გაქვს. სადაც, უამრავი მცდელობის შემდეგ, როგორც იქნება, გააღწევ ერთ-ერთი კონკურსიდან, იმუშავებ ასე თორმეტი წლის განმავლობაში და ეტაპ-ეტაპ ახვალ გარკვეულ დონემდე, საიდანაც უკვე შეგიძლია ადამიანური პირობები შეუქმნა მოხუცებულ მშობლებს, მცირეწლოვან შვილს და უცებ, შესაძლოა გამოჩნდეს ოთხი-ხუთი კაცი, ვისაც საკუთარი მამისა თუ ბიძის კანტორა ჰგონია ადმინისტრაციული ორგანო, რომელთაც ვიღაცის დაუდევრობით ჩაუვარდათ ხელში ძალაუფლება, მას ბოროტად იყენებენ და უსამართლოდ გათავისუფლებენ სამსახურიდან.

ისევ შენი მაღალი მოქალაქეობრივი პასუხისმგებლობიდან გამომდინარე, რომ ამ ქვეყანაში ერთხელ და სამუდამოდ უნდა დამთავრდეს არაცივილური (აქციები, შიმშილობა) მეთოდებით საკუთარი სიმართლის ძიება, მიმართავ ჯერ მინისტრს, მერე პრემიერმინისტრს, სასამართლოს და ვერსად იპოვი სიმართლეს.

სადაც სამსახურიდან გამოგდების წინ გეტყვიან, რომ ვერაფერს იზამ, რომ შანსი არ გაქვს შენი სიმართლე დაამტკიცო, რადგან ყველგან ესენი არიან, ყველგან დაგხვდებიან და ეს ვარლამ არავიძის დამცინავი ღიმილი...

ქვეყანაში, სადაც უკვე ძალიან მიჭირს გაძლება, გავდივარ ქუჩაში!

სირცხვილია ისე ბნელოდეს ქვეყანაში, რომ ერთი კაციც კი არ გამოჩნდეს პასუხისმგებელ პირებში, ვინც გაარჩევს თეთრს შავისგან და იტყვის, რომ ორჯერ ორი ოთხია, ოთხი!.. და არა სამოცდაშვიდი ან ასოთხმოცდათვრამეტი.

ამ ნაწერის დასაწერად არ დამჭირვებია ღამეების თენება, რადგან ეს ყველაფერი ტვინში მაქვს და ძილშიც არ მავიწყდება.

ბუნებრივია, ამ სტატუსში ვერ ამოვწურავ სამსახურიდან ჩემი გათავისუფლების თემას, ამიტომ ამაზე ცალკე და დაწვრილებით ვილაპარაკებ სხვა ფორმატში. ოფიციალური კომენტარი შეუძლია გააკეთოს "საერთაშორისო გამჭვირვალობა საქართველომ". ეს ორგანიზაცია იცავდა სასამართლოში ჩემს ინტერესებს.

ვიცი, რომ ახლა საშინლად ყინავს ქუჩაში, მინუს ტემპერატურაა და ჩემი სუსტი ჯანმრთელობით, ალბათ, მაქსიმუმ ოთხ-ხუთ დღეს გავძლებ იქ, მაგრამ ასეთი ოთხი-ხუთი დღის სიცოცხლეც კი მირჩევნია სიბერემდე მუხლებსა და უკანალზე გამობერილი ბამბის შარვლით ოთახიდან ოთახში სიარულს.

!!!!!!! - ეს არის აბსოლუტურად მშვიდობიანი აქცია, ყოველმხრივ! ისეთი, რომ იქ, სადმე დაგდებულ კენჭსაც კი არ მივარტყამ ფეხს. ასევე, მინდა ვთხოვო ყველა იქ მომსვლელს, რომ გაიზიაროს ჩემი დამოკიდებულება და არავითარ შემთხვევაში არ დაარღვიოს საზოგადოებრივი წესრიგი. ეს არის ჩემი პასუხი შესაძლო პროვოკაციებზე.

ეს არის მხოლოდ ჩემი, ნიკა ჩერქეზიშვილის, პიროვნული გადაწყვეტილება და მას არანაირი პოლიტიკური სარჩული არ გააჩნია! არცერთი პოლიტიკური ძალა არ დგას ამ ყველაფრის უკან! გამოვთქვამ იმედს, რომ არც არავინ ეცდება შექმნილი მდგომარეობის სათავისოდ გამოყენებას და საკუთარ წისქვილზე წყლის დასხმას. მინდა ადამიანური, კონსტრუქციული დიალოგი მეორე მხარესთან და შუამავალი არ მჭირდება.

ძალიან მნიშვნელოვანი: არ მჭირდება მოჩვენებითი თანაგრძნობა და პურიტანული სამძიმრები. გთხოვთ, ნუ დამიწერთ კომენტარებში ცრემლიან სმაილებს და ა.შ. მჭირდება რეალური თანადგომა, თუ ვინმე გულწრფელად შეწუხდება ამ ყველაფრით და არ იქნება მისთვის სულერთი ის, რაც ხდება.

მოთხოვნა: დამიბრუნონ, რაც უკანონოდ წამართვეს - სამსახური, რადგან გუშინ არ ჩამოვფრენილვარ ციდან და დღეს არ ვითხოვ დასაქმებას. ეს არის ჩემი და მთლიანად ჩემი ოჯახის მრავალწლიანი წვალების შედეგი. სხვანაირად ვერ ვიპოვიდი საკუთარ თავში მორალურ უფლებას მომეთხოვა რამე, რადგან ქვეყანაში ჩემ გარდა ათასობით უმუშევარია და ნამდვილად არ მგონია, ვინმეზე რამით მეტი ვიყო.

თითქმის წელიწადნახევარია გავდივარ სხვადასხვა კონკურსებზე და მიუხედავად ნაჩვენები დადებითი შედეგებისა, ვერ ვიწყებ მუშაობას, იმის გამო, რომ გაფუჭებული და გაშავებული მაქვს პირადი საქმე. ამ მოცემულობით, ფაქტობრივად, შანსი არ მაქვს, რომ დავსაქმდე და ვაკეთო ის საქმე, რაც მიყვარს და რაც კარგად ვიცი.

მოკლედ, გავდივარ და ვდგები სახელმწიფო კანცელარიის წინ და ტრაქტორსაც რომ გამომაბან, ვერავინ დამძრავს იქიდან, ვიდრე ჩემი სამართლიანი მოთხოვნა არ დაკმაყოფილდება. გავდივარ შიშველი ხელებით, საკვების, კარვის, პლედისა და ყოველგვარი, სხვა ასეთ პირობებში აუცილებელი საჭიროებების გარეშე. მივალ და დავდგები უბრალოდ, როგორც ზევით უკვე აღვნიშნე, აბსოლუტურად მშვიდობიანი ფორმით!

მეგობრებო, შესაძლოა, ეს ყველაფერი ფატალურად დასრულდეს, რადგან არ ვხუმრობ. რთული გასააზრებელი არ არის, რა შეიძლება მოჰყვეს ასეთ ამინდში ოცდაოთხი საათით ღია ცის ქვეშ დგომას და კაცმა არ იცის, ეს ოცდაოთხი საათი რამდენად იქცევა კიდევ. ამიტომ, გთხოვთ, ნუ იქნებით გულგრილები, რადგამ ამ საერთო გულგრილობამ უკვე ძალიან ბევრჯერ დაალაქავა ჩვენი ქვეყნისა და ქალაქის ისტორია. ერთ კაცის უგულებელყოფა ადვილია და ბევრის - შეუძლებელი.

გთხოვთ ყველას, რომ გააზიაროთ ეს პოსტი, რათა რაც შეიძლება მეტმა ადამიანმა ნახოს და პირველს და მეორეს თუ არაფერი შეუძლია, იქნებ, მესამემ და მეოთხემ მიიტანოს გულთან", - წერს ნიკა თავის ფეისბუქ გვერდზე.

კომენტარები

ამავე რუბრიკაში

12 ივლისი
12 ივლისი

ვიდეო ► თეონა ბერიძის არჩევანი

18 წლის მუსლიმი გოგონა არჩევნის წინაშეა - სთხოვენ, თავსაფარი მოიხსნას, რომელიც ნებაყოფლობით დაიფარა და გადაწყვიტა, მთელი ...
19 მაისი
19 მაისი

ვიდეო ► "უფრო სქელი კანი" - ეძღვნება ჰომ ...

17 მაისს, ჰომოფობიასთან ბრძოლის დღეს, კლუბ "ელექტროვერკის" სივრცეში პოეტმა ანდრო დადიანმა პერფორმანსი ჰომ ...
03 მაისი
03 მაისი

ვიდეო ► „დეკრიმინალიზება - უალტერნატივო ...

2 მაისს „თეთრი ხმაურის მოძრაობამ“ და „ნარკოპოლიტიკის ეროვნულმა პლატფორმამ“ ნარკოპოლიტიკაში ...

მეტი

^