საქართველოს თავდაცვის ყოფილი მინისტრის, დავით კეზერაშვილის ექსტრადირებაზე საფრანგეთის სასამართლომ უარი განაცხადა. "ინტერპრესნიუსის" მიერ გავრცელებული ინფორმაციით, საფრანგეთის სასამართლოს დღევანდელი გადაწყვეტილებით, კეზერაშვილს ელექტრონული სამაჯურიც მოეხსნება.
დავით კეზერაშვილი ქართული მხარის მოთხოვნით, საფრანგეთში 2013 წლის 15 ოქტომბერს დააკავეს. საფრანგეთის სასამართლომ იგი პატიმრობიდან ელექტრონული სამაჯურის გამოყენების პირობით იყო გათავისუფლებული.
მის წინააღმდეგ სისხლის სამართლის ორი საქმეა აღძრული - კონტრაბანდული სპირტის საქმე, მეორე კი - ტელეკომპანია "იმედის" და რიყის ტერიტორიის გასხვისების საქმე, სადაც თავდაცვის ყოფილი მინისტრი ბრალდებულია გიგი უგულავასთან ერთად. აღნიშნილი საქმეების განხილვა თბილისის საქალაქო სასამართლოში მიმდინარეობს.
