ფრაქცია „ქართული ოცნების" წევრმა სოსო ჯაჭვლიანმა „დისკრიმინაციის ყველა ფორმით აღმოფხვის შესახებ კანონიდან“ ტერმინების „სექსუალური ორიენტაციის“ და „გენდერული იდენტობის“ ამოღების შესახებ კანონპროექტი მოამზადა. კანონპროექტს ბიუროს დღევანდელ სხდომამ მსვლელობა მისცეს.
აღსანიშნავია, რომ კანონპროექტის ავტორი დემოგრაფიული განვითარების ფონდის დირექტორი ზვიად ტომარაძეა.
კანონპროექტის განმარტებით ბარათში აღნიშნულია, რომ 2014 2 მაისს პარლამენტმა საზოგადოების დიდი ნაწილისა და საქართველოს საპატრიაქოს წინააღმდეგობის მიუხედავად, ანტიდისკრიმინაციული კანონი მიიღო.
„საკანონმდებლო სივრცეში სექსუალური ორიენტაციისა და გენდერული იდენტობის ასახვით დაირღვა ზნეობრივი ნორმები. საქართველოს კონსტიტუცია ისედაც იცავს ყველა მოქალაქის თანაბარუფლებიანობას. ასეთი სამართლებრივი მიგდომა არა თუ არ იცავს, არამედ დამანგრეველია ოჯახისა და საზოგადოების მორალისთვის.
დისკრიმინაციისგან დაცვის საბაბით ხდება, იმ ადამიანების სერიოზული დისკრიმინაცია, ვინც პატივს სცემს ტრადიციულ მორალსა და ოჯახური ფასეულობებს.
„სექსუალური მრავალფეროვნების“ ხელშემწყობი, სხვადასხვა სახის ამორალური, წამახალისებელი ფსევდოღირებულებები საზიანოა საზოგადოებისთვის და არაფერი აქვს საერთო, როგორც კაცობრიობის რეალურ ფუძემდებლურ ღირებულებებთან, ასევე ადამიანის ჭეშმარიტ, საყოველთაოდ აღიარებულ უფლებებთან.
ისინი ეწინააღმდეგება ჩვენი პლანეტის ძირითად რელიგიურ ფასეულობებს და სწავლებებს. ამ ფესევდოღირებულებების დანიშნულება ოჯახის ინსტიტუტის, საზოგადოების ზნეობრივი და სულიერი საფუძვლების განადგურებაა. არსებული კანონი ასახავს ამ სამწუხარო ტენდენციებს.
იმის მაგივრად, რომ დაიცვას უმცირესობები, რომლებიც საქართველოში იდესაც დაცულები არიან ჩვენი მრავალფეროვანი საზოგადოების მიერ საუკუნეების განმავლობაში გამოცდილი, ძველი ტრადიციებით, ის გვთავაზობს და ხელს უწყობს არა მარტო ამორალურ, არამედ კონტრპროდუქტიულ, საკამათო ქცევასა და მენტალიტეტს.
დასავლეთის ბევრ ქვეყანას ძვირი დაუჯდა ასეთი ქცევა და მენტალობა. გასათვალისწინებელია ის ფაქტორიც, რომ საქართველოს უმძიმეს დემოგრაფიულ სიტუაციაში იმყოფება, გაეროს კვლევების მიხედვით, როგროც ერი გადაშენების პირას ვართ. ამ შემთხვევაში კი ტრადიციულ ოჯახში, როგორც საზოგადოების ბუნებრივი და ძირითადი უჯრედი დაცული იყოს საზოგადოებისა და სახელმწიფოს მხრიდან", - ვკითხულობთ განმარტებით ბარათში.
