სტუდენტურ თვითმმართველობასთან შეხვედრის შემდეგ თსუ-ის რექტორმა ლადო პაპავამ განაცხადა, რომ უნივერსიტეტში შესულები არიან უცხო პირები.

„უნივერსიტეტში შემოსულნი არიან ისეთი ადამიანები, როგორც ახალგაზრდები, ასევე ასაკოვნები, რომლებიც არ არიან უნივერსიტეტის სტუდენტები და არც თანამშრომლები. ამიტომ ვსარგებლობ შემთხვევით და ყველას მოვუწოდებ, პატივი სცენ უნივერსიტეტს და დატოვონ უნივერსიტეტის ტერიტორია. ამის გარეშე კონსტრუქციული სამუშაოს გაგრძელება გვიჭირს“, - განაცხადა პაპავამ.

იგი ამბობს, რომ გადადგომას არ აპირებს.

„ავუხსენი მათ რა სიტუაციაა. ისინი მიმართავენ იმ ფორმას, რა ფორმაც შეარჩიეს და რჩებიან აკადემიური საბჭოს ოთახში. მე მივეცი პირობა, რომ მათზე ზეწოლა არ განხორციელდება არც დაცვის სამსახურის და პოლიციის მხრიდან. მათ არავინ არ დაარბევს“, - აღნიშნა ლადო პაპავამ.

მისი განცხადებით, საუბარი და დიალოგი გრძელდება.