„ბიძინამ სოლოლაკის საკარმიდამოს თბილისის ბოტანიკური ბაღის კუთვნილი 4 ჰექტარი მიწის ნაკვეთი მიუერთა. რა თქმა უნდა, ეს ყველაფერი მალულად", - აცხადებს „ერთიანი ნაციონალური მოძრაობის“ წევრი ნიკა მელია.

იგი აკონკრეტებს, რომ სოლოლაკის ტერიტორიის ახალი მესაკუთრე არის შპს „ფინსერვის XXI“, რომელზეც ივანიშვილის ბიზნესცენტრია რეგისტრირებული.

როგორც „ერთიანი ნაციონალური მოძრაობის" წევრი, თბილისის საკრებულოს დეპუტატი ირაკლი აბესაძე აცხადებს, ამ და მიმდებარედ არსებულ ნაკვეთზე ჯამურად 390 000 კვ.მ ლანდშაფტურ-სარეკრეაციო, აქტიური გამწვანების ზონაში მერიამ დაუშვა მშენებლობა".

აბესაძის თქმით, ივანიშვილმა მერიას შეაცვლევინა და გადაიტანა კრწანისი-შინდისის მშენებარე გზა, რომლის გამოც უკვე მოჭრილი და გადარგულია 550-მდე ხე, დახარჯული თითქმის 700 000 ლარი იქ არსებული გაზის მილის გადასატანად. „აღმოჩნდა, რომ ბუნება გაიჩეხა და საბიუჯეტო სახსრები დაიხარჯა მხოლოდ იმიტომ, რომ ბიძინას რეზიდენციის მშენებლობისთვის გათავისუფლებულიყო პოლიგონი“, - აღნიშნავს აბესაძე. 

ნიკა მელიას ინფორმაციით, აღნიშნული ტერიტორია მერიამ 22 აპრილს გაიტანა აუქციონზე, რომელიც 3 მაისს დასრულდება. ნიკა მელიას ინფორმაციით, მყიდველის ვინაობის გამოცნობა ადვილია.

ნიკა მელია ორ მოთხოვნას აყენებს: პირველი - ივანიშვილმა დააბრუნოს ბოტანიკური ბაღის ტერიტორია და მეორე - ნარმანიამ გააკეთოს საჯარო განცხადება და პირობა დადოს, რომ გააუქმებს უკანონო გადაწყვეტილებას.

„ეს არის არასწორად გავრცელებული ინფორმაცია“ - ასე გამოეხმაურა მერის მოადგილე ირაკლი ლექვინაძე „ერთიანი ნაციონალური მოძრაობის“ წევრების მიერ გავრცელებულ ინფორმაციას.

„ის, რომ ბოტანიკურ ბაღს ჩამოერთვა ტერიტორია და გადაეცა კონკრეტულ რეზიდენციას, ეს ასე არ არის. მოხდა ბოტანიკურის საზღვრების კორექტირება. იმ 4 ჰექტარის სანაცვლოდ, რომელიც ბოტანიკურ ბაღს ჩამოერთვა, გადაეცა ბევრად უკეთესი ტერიტორია“, - ჟურნალისტებთან საუბარში განაცხადა ირაკლი ლექვინაძემ. მისივე განმარტებით, ეს ყველაფერი ბოტანიკური ბაღის ინტერესებიდან გამომდინარე მოხდა, რადგან გადაცემული ტერიტორია მცენარეთა პოპულაცია და ტურისტული მიზნებიდან გამომდინარე არის ბევრად უკეთესი. გადაცემული ტერიტორია არის კრწანისი-შინდისის მიმდებარედ.