ფრაქცია „ქართული ოცნების" თავმჯდომარე გია ვოლსკი „რესპუბლიკური პარტიის" საარჩევნო სიის პირველი ნომრის, დავით უსუფაშვილის განცხადებას ეხმაურება და ამბობს, რომ წინასაარჩევნო პერიოდში პარტიული სახეების საკუთარი პარტიის მუშაობის რეჟიმში გადასვლა ძალიან ნორმალური პროცესია.
„საარჩევნო სისტემა არის შემოთავაზებული, რომელიც ერთად გავიტანეთ, ერთად დავამტკიცეთ, მათ შორის „რესპუბლიკელებიც“ იყვნენ ამის ერთ-ერთი მთავარი ჩამომყალიბებლები ჩვენთან ერთად“, - განაცხადა გია ვოლსკიმ.
დღეს „რესპუბლიკური“ პარტიის ბრიფინგზე დავით უსუფაშვილმა განაცხადა, რომ მათმა პარტიამ „ქართულ ოცნებას“ შესთავაზა, „რესპუბლიკელ“ მინისტრებს მოვალეობა არჩევნებამდე შეესრულებინათ, თუმცა „„ქართულმა ოცნებამ“ სხვაგვარად გადაწყვიტა. მიიჩნია, რომ მრავალპარტიული კოალიციური მთავრობა წინასაარჩევნო კამპანიის დროს არის მიუღებელი“.
