მსახიობი გიორგი გიორგანაშვილი, იგივე ბახალა, წინასწარი პატიმრობიდან 20 000 ლარის გირაოს სანაცვლოდ გაათავისუფლეს. მოსამართლემ მიიღო დაცვის მხარის შუამდგომლობა აღკვეთის ღონისძიების შეცვლის შესახებ, როს შედეგადაც ბახალა დარბაზიდან გათავისუფლდა.
მსახიობი ხუთი თვის წინ ნარკოდანაშაულისთვის დააკავეს. მას ბრალი განსაკუთრებით დიდი ოდენობით ბუპრენორფინის პირადი მოხმარების მიზნით ფლობისათვის წაუყენეს, სასჯელის ზომად კი 8-დან 20 წლამდე ან უვადო პატიმრობა ემუქრება.
გუშინ მსახიობის მხარდამჭერი აქცია გაიმართა.
„საქმეში ბახალას უდანაშაულობის დამადასტურებელი მრავალი არსებითი დარღვევა იკვეთება. ბოლო პერიოდის „ჩადების“ გახმაურებული ფაქტების მსგავსად გიორგის საქმეშიც მხოლოდ პოლიციელები გვევლინებიან მოწმეებად. დაკავების მომენტში ის გადაიყვანეს და გაჩხრიკეს ბნელ, უკამერო ადგილას. გიორგის დაჟინებული მოთხოვნის მიუხედავად კი ჩხრეკას ნეიტრალური პირი არ დაასწრეს. რაც ყველაზე საგანგაშოა, დაკავების დღიდან მას გარე სამყაროსთან კონტაქტის ყველა საშუალება აეკრძალა. ფიზიკური ტყვეობის გარდა, ის 5 თვეა, ინფორმაციულ ტყვეობაშიც იმყოფება. დღემდე, კომუნიკაციის ერთადერთი გზა მისი ადვოკატები არიან. გიორგი გამოძიების მხრიდან მასზე პერმანენტულ ზეწოლაზე მიუთითებს“, - ამბობენ აქციის ორგანიზატორები.
ამავე თემაზე:
„ერთად ბახალასთვის“ - დედაენის ბაღში გიორგი გიორგანაშვილის მხარდამჭერი აქცია დაიწყო
აქციაზე ბახალას მეგობრებმა მისი წერილი წაიკითხეს. წერილში, რომელიც მან ციხიდან გამოგზავნა ნათქვამია, რომ არ აპირებს არანაირ კომპრომისზე წასვლას.
„ბოლომდე სამართლებრივად მივყვები პროტესტს, რისთვისაც მხოლოდ თქვენი თანადგომა მჭირდება. პროკურატურა ბოლომდე შეეცდება ჩემ ჩაძირვას და განადგურებას. ჩემი გამართლების შემთხვევაში, რამდენიმე პოლიციელის თავი ეწირება ამ ამბავს და შეეცდებიან, მაქსიმალურად მოახდინონ ჩემზე ფსიქოლოგიური ზეწოლა, რომ დავნებდე და გავტყდე,“- წერს მსახიობი გიორგი გიორგანაშვილი.
ამავე თემაზე:
ბახალას წერილი ციხიდან: არ ვაპირებ კომპრომისზე წასვლას, თქვენი თანადგომა მჭირდება
