„რაც დავდექი მინისტრად, ნახევარზე მეტი ვიმუშავე, ნახევარი მომიწია შვებულება" - ამის შესახებ ეკონომიკის მინისტრმა გიორგი ქობულიამ „რუსთავი 2-თან" საუბარში განაცხადა.

მინისტრის თქმით, შვებულებას ჯანმრთელობის მდგომარეობასთან დაკავშირებული პრობლემების მოსაგვარებლადაც იყენებს.

„რაც დავდექი მინისტრად, ნახევარზე მეტი ვიმუშავე, ნახევარი მომიწია შვებულება, მაგრამ აქედან მაქვს კონტაქტი ჩემს ხალხთან. მაქსიმალურად ვცდილობ, რომ საკითხები გადავწყვიტო. მე რომ მცოდნოდა, რომ მინისტრად ვდგებოდი არა ივლისში, არამედ მაისში, მაშინ ასეთი საკითხი არ იდგებოდა. რადგან ეს გადაწყვეტილება ძალიან სწრაფად მოხდა, მე უკვე ვეღარ შევცვალე ბევრი რაღაც, ჯანმრთელობასთან დაკავშირებით მქონდა რაღაცეები, რაც უნდა დავასრულო,“ - განაცხადა გიორგი ქობულიამ „რუსთავი 2-თან" სატელეფონო საუბარში.

ქობულიას კანდიდატურა ეკონომიკის მინისტრის თანამდებობაზე პრემიერმა 12 ივლისს წარადგინა.