ჩემი ინტერესის საგანს ოდესღაც “RMG GOLD”-ის საკუთრებაში არსებული შენობის მობინადრეები წარმოადგენენ (ეს შენობა წლების წინ სახელმწიფოს გადაეცა).
აქ კაზრეთის “RMG GOLD”-ის ოქროს საბადოს ყოფილი მუშები, სოციალურად დაუცველი ადამიანები, (რომლებსაც ხშირად აქვთ ჯანმრთელობის პრობლემები), ბავშვები (რომელთაც არ აქვთ სწავლის შესაძლებლობა) და აფხაზეთიდან დევნილები ცხოვრობენ. ამჯერად ჩემი ფოტოკამერის ვიზირში სწორედ ისინი მოხვდნენ. ფოტოპროექტი ამ ადამიანების გაუსაძლის ყოფას აღწერს. ეფექტის გასამძაფრებლად უკანა პლანზე ყოველდღიური ლამაზი ცხოვრების ამსახველი ბანერები მოჩანს, რაც კიდევ უფრო აშკარას ხდის კონტრასტს ამ ადამიანების ყოფასა და ბანერებზე ასახულ ცხოვრებას შორის.
მინდა პროექტი ერთგვარ გამოწვევად იქცეს მნახველში ემპათიისა და სინდისის ქენჯნის გასაღვიძებლად. ფონებად გამოყენებული ესთეტიკური სიამოვნების მომგვრელი, ყოველდღიური ცხოვრების ნაწილად ქცეული ლამაზი და მსუყე ცხოვრების ამსახველი სარეკლამო ხასიათის ბანერები მნიშვნელოვან როლს თამაშობენ ადამიანების სურვილებისა და მისწრაფებების ფორმირებაში. ისინი შირმად აჰფარებიათ რეალურ, დუხჭირ ცხოვრებას. პრიალა და ჰიპერრეალური ხატები (იქნება ეს განათებული ეიფელის კოშკი თუ ბედნიერი ოჯახი) კაზრეთის მკვიდრების ცხოვრებისგან დიამეტრულად განსხვავებულ ცხოვრებას გვიჩვენებს. ჩემი მიზანია, ამ წინააღმდეგობით მნახველმა იგრძნოს დისკომფორტი და არა ესთეტიკური კმაყოფილება; გაუჩნდეს პროტესტი და მოქმედების სურვილი არსებული რეალობის წინააღმდეგ.
