კოალიცია "მედიის ადვოკატირებისთვის" აჭარის ტელევიზიასა და რადიოში მიმდინარე პროცესებს ეხმაურება. როგორც განცხადებაშია აღნიშნული, კოალიცია საზოგადოებრივი მაუწყებლის აჭარის ტელევიზიასა და რადიოში მიმდინარე რეფორმირების პროცესს ყურადღებით აკვირდება.
"საზოგადოებრივი მაუწყებლის სტატუსის მიღებიდან 10 დღეში მაუწყებლის დირექტორმა საკამათო საკადრო ცვლილებები გაუმჭვირვალედ და ერთპიროვნულად განახორციელა: თანამშრომელთა ნაწილს შეუწყდა კონტრაქტი, ნაწილი კი დაწინაურდა, დაწინაურებულთა შორის მოხვდნენ ისეთებიც, რომლებმაც ამავე დირექტორის მიერ 2013 წელს ჩატარებული კონკურსი ვერ გაიარეს. საყურადღებოა ის გარემოებაც, რომ აღნიშნული საკადრო ცვლილებების შედეგად უფროსის გარეშეა დარჩენილი საინფორმაციო სამსახური, რომლის საქმიანობა დამოუკიდებელ მედიამონიტორთა მხრიდან 2013 წლის საპრეზიდენტო არჩვენების გაშუქებისას დადებითადაა შეფასებული. არსებითად მნიშვნელოვანია, მაუწყებლის რეორგანიზების პროცესი არ წარიმართოს ისე, რომ საფრთხე შეექმნას და გაუარესდეს საინფორმაციო სამსახურის საქმიანობა.
კოალიცია მოუწოდებს საზოგადოებრივი მაუწყებლის აჭარის ტელევიზიისა და რადიოს დირექტორს გამჭვირვალედ და სამართლიანად წარმართოს კონკურსი მაუწყებლის მმართველი პოზიციების დასაკავებლად",- აღნიშნულია კოალიციის განცხადებაში.
კოალიციის წევრი ორგანიზაციებია:
- ფონდი „ღია საზოგადოება საქართველო“;
- საქართველოს ახალგაზრდა იურისტთა ასოციაცია (საია);
- საქართველოს ჟურნალისტური ეთიკის ქარტია;
- საქართველოს რეგიონულ მაუწყებელთა ასოციაცია (GARB);
- რეგიონულ მაუწყებელთა ქსელი;
- რეგიონული მედიის ასოციაცია;
- მედიაკლუბი;
- პრესის ასოციაცია;
- ლევან მიქელაძის სახელობის ფონდი;
- ინფორმაციის თავისუფლების განვითარების ინსტიტუტი (IDFI)
- სამოქალაქო განვითარების ინსტიტუტი.