„ნაციონალური მოძრაობის“ წევრის, ირაკლი ნადირაძის განცხადებით,  თბილისის მერიის განათლების, სპორტისა და ახალგაზრდობის საქმეთა საქალაქო სამსახურის უფროსის თანამდებობაზე გიორგი არეშიძე მხოლოდ იმიტომ ინიშნება, რომ ენერგეტიკის მინისტრის, კახა კალაძის ცოლისძმაა.

„გიორგი არეშიძეს CV-ში სამუშაო გამოცდილებად მხოლოდ „ქართულ ოცნებაში“ ყოფნა უწერია“, - ამბობს ნადირაძე. მის განცხადებას სხდომაზე ხმაური მოჰყვა.

თბილისის მერის მოადგილის, ალუდა გოგლიჩიძის თქმით, გიორგი არეშიძე იმიტომ არ შეურჩევიათ, რომ კახა კალაძის ცოლისძმაა.

„მას საკმაოდ კარგი გამოცდილება აქვს და უხელმძღვანელებს ისეთ სამსახურს, რომელიც ახალგაზრდულ საქმეებს შეეხება. იგი ძალიან აქტიურად მუშაობდა ახალგაზრდულ პროექტებზე“, - განაცხადა ალუდა გოგლიჩიძემ.

როგორც არეშიძე ამბობს, მან პოლიტიკური საქმიანობა კახა კალაძესთან ერთად დაიწყო.

„მე და ჩემი სიძის, კახა კალაძის პოლიტიკაში მოღვაწეობა ერთად დაიწყო. ძალიან მეამაყება, რომ კახა კალაძე ჩემი სიძეა, მაგრამ არ ვაპირებ, ვინმეს ჩრდილქვეშ ვიყო. მე ვარ გიორგი არეშიძე და CV-ში სწორედ ასე მიწერია და სწორედ ჩემი სახელი და გვარით ვაპირებ პოლიტიკური კარიერის გაგრძელებას. არსად მითითებული არ მაქვს, რომ მე ვარ კახა კალაძის ცოლისძმა“, - განაცხადა გიორგი არეშიძემ.

ოპოზიციის უკმაყოფილების მიუხედავად, საკრებულომ გიორგი არეშიძე თბილისის მერიის განათლების, სპორტისა და ახალგაზრდობის საქმეთა საქალაქო სამსახურის უფროსის თანამდებობაზე დაამტკიცა.