თუ ჩემი გუნდი შეძლებს იმას, რომ ყოველი მომდევნო დღე ქართველი ხალხის ცხოვრებაში ოდნავ უკეთესი იყოს, ვიდრე წინა, მაშინ შეიძლება ითქვას, რომ ჩვენს მოვალეობებს ვასრულებთ, - ამის შესახებ საქართველოს პრემიერ-მინისტრმა, ირაკლი ღარიბაშვილმა დიპლომატიური კორპუსისა და საერთაშორისო ორგანიზაციების წარმომადგენლებისთვის გამართულ მიღებაზე განაცხადა.
პრემიერის განცხადებით, ეს ნიშნავს, რომ ყოველდღე ოდნავ მეტი ძალისხმევა და სიბრძნე უნდა გამოვიჩინოთ.
„ზოგჯერ შეცდომებიც შეიძლება დავუშვათ, მაგრამ თუ დროის უდიდესი ნაწილი წარმატებული იქნება, მაშინ საქართველო ბევრად უკეთესი ქვეყანა გახდება. თუ გადავხედავთ 2014 წელს, ჩემი აზრით, ქართველი ხალხის ცხოვრებაში უმეტესობა დღეებისა წინა დღეზე უკეთესი იყო. ჩვენ, მართლაც, ძალიან ბევრს მივაღწიეთ რთულ პირობებში“, - განაცხადა ღარიბაშვილმა.
პრემიერის თქმით, მისი მიზანია, 2015 წელი იყოს ნამდვილი „შრომის წელიწადი“. ღარიბაშვილი ამბობს, რომ ის და მისი გუნდი ძალ-ღონეს არ დაიშურებს და იმუშავებს იმისათვის, რომ საქართველოს ყველა მოქალაქის ცხოვრება გაუმჯობესდეს და უზრუნველვყოფილი იყოს ჩვენი ქვეყნის კეთილდღეობა და მშვიდობიანი მომავალი.
„ყოველი დღე ოდნავ უკეთესი იქნება, ვიდრე წინა. იმედის თვალით შევყურებ მომავალ წელს. დარწმუნებული ვარ, რომ კიდევ უფრო გავაღრმავებთ თქვენთან თანამშრომლობას და უფრო დიდ წარმატებას მივაღწევთ“, - განაცხადა პრემიერმა.