ბიზნესომბუდსმენმა პარლამენტს „ეროვნული ბანკის შესახებ“ კანონში ცვლილებების განხილვის გადადების თხოვნით მიმართა. გიორგი გახარიას განცხადებით, შესაბამისი თხოვნით მას საბანკო ასოციაციამ მიმართა.
„ჩვენ მივმართეთ თხოვნით პარლამენტს, რომ საკანონმდებლო ცვლილებათა პაკეტის განხილვა ხვალ არ დაიწყოს და რამდენიმე დღით გადაიდოს“, - აღნიშნა გახარიამ.
მისი თქმით, მზაობა არის დეპუტატების მხრიდანაც.
პარლამენტი პირველი მოსმენით საკანონმდებლო პაკეტის განხილვას იწყებს, რომელიც ეროვნული ბანკიდან საბანკო სექტორის ზედამხედველობის სამსახურის გასვლას ითვალისწინებს. „ეროვნული ბანკის შესახებ“ კანონსა და სხვა კანონებში დაგეგმილი ცვლილებების განხილვა ხვალ იურიდიულ საკითხთა, დარგობრივი ეკონომიკისა და ეკონომიკური პოლიტიკის, საპროცედურო საკითხთა, საფინანსო-საბიუჯეტო კომიტეტების გაერთიანებულ სხდომაზე იგეგმება.
დეპუტატების, თამაზ მეჭიაურისა და ნოდარ ებანოიძის ავტორობითა და ინიციატივით პარლამენტში წარდგენილი ცვლილებების მიხედვით, საფინანსო სექტორის ერთადერთი სახელმწიფო საზედამხედველო ორგანო საქართველოს საფინანსო ზედამხედველობის სააგენტო იქნება. ეროვნული ბანკის ფარგლებში მოქმედი საფინანსო სექტორის ზედამხედველობის კომიტეტი კი უქმდება.
