თბილისის ვიცე-მერმა, დიმიტრი ქუმსიშვილმა მედიას 13 ივნისს თბილისში მომხდარი სტიქიით გამოწვეული ზარალის შესახებ ინფორმაცია გააცნო.
„გუშინ ჩვენ გვქონდა შეხვედრა მსოფლიო ბანკის ექსპერტებთან, რომლებმაც წარმოგვიდგინეს საჭიროებების პირველი შეფასება. არის ორი მონაცემი - ზარალი, რომელიც ინფრასტრუქტურამ და მოსახლეობამ მიიღო, დაახლოებით, 70 მილიონამდე ავა, თუმცა ზოოპარკის გადატანის ხარჯთან ერთად, თანხა 200 000 მილიონამდე იქნება", - განაცხადა ქუმსიშვილმა.
ვიცე-მერმა თბილისის ბიუჯეტში ამ დროისთვის არსებული და უკვე გადანაწილებული თანხების შესახებ ისაუბრა. დიმიტრი ქუმსიშვილის განცხადებით, ინფრასტრუქტურული პროექტებისა და აღდგენითი სამუშაოებისთვის დედაქალაქის ბიუჯეტში 15 959 000 ლარია გადანაწილებული. აღნიშნული თანხიდან 12 007 000 მობილიზებულია ცენტრალური ბიუჯეტიდან, 2.441.000 ლარი მერიამ შიდა რესურსის გადანაწილებით მიიღო, ხოლო კერძო სექტორიდან მობილიზებული 1.511.000 ლარითა და სხვა საბიუჯეტო რესურსებით გამგეობები დაზარალებული მოსახლეობის საცხოვრებელი სახლებისა და ეზოების შეკეთებას უზრუნველყოფენ.
გარდა ამისა, ვიცე-მერმა მადლობა გადაუხადა ყველა ადამიანს, ვინც შემოწირულობა გაიღო.
„სწორედ თითოეული თქვენგანის დახმარებით ხდება შესაძლებელი დაზარალებული 50-მდე ოჯახის მუდმივი საცხოვრისით უზრუნველყოფა, - მიმართა დიმიტრი ქუმსიშვილმა მოქალაქეებს.
დიმიტრი ქუმსიშვილის განცხადებით, 5 ივლისს დედაქალაქის საკრებულოს მიერ დამტკიცებული წესის ამოქმედების შედეგად, განაცხადი უკვე მიღებულია სტიქიით დაზარალებული 7 ოჯახისგან. სულ 37 ადამიანისთვის სპეციალურად გაიხსნა საგარანტიო ანგარიშები, სადაც მათთვის განკუთვნილი 1 657 453 ლარი უახლოესი დღეების განმავლობაში აისახება.
„მინდა აღვნიშნო, რომ დღეის მდგომარეობით დაზარალებული ოჯახების საცხოვრებლით უზრუნველყოფისათვის, განსახლებისა და სახლების რეაბილიტაციისათვის საჭირო თანხა 18 მლნ. ლარს შეადგენს, საიდანაც ხელმისაწვდომია 10 მილიონი ლარი. აქ გასაკუთრებული მადლობა მინდა გადავუხადო საერთაშორისო საქველმოქმედო „ფონდ ქართუს“ და მის დამფუძნებელს იმისთვის, რომ წესით აღებული ვალდებულებების შესასრულებლად ჩარიცხავს 8 მილიონ ლარს“, - განაცხადა დიმიტრი ქუმსიშვილმა.
