„მე მინდა, სიამოვნებით აღვნიშნო, რომ პირველ რიგში, ვიდრე რამეზე დავილაპარაკებდით, ქიბარს ვესაუბრეთ, როგორი ხედვა აქვს ტელევიზიის მომავალთან დაკავშირებით და მთლიანად ემთხვევა ჩვენი ხედვა ტელევიზიის მომავლის შესახებ ქიბარის ხედვას." - განაცხადა დავით დვალმა ამ წუთებში „რედისონში“ მიმდინარე პრესკონფერენციაზე. დავით დვალი გუშინ საქალაქო სასამართლოს განჩინების საფუძველზე რეზო საყევარიშვილთან ერთად „რუსთავი 2-ის“ დროებით მმართველად დაინიშნა. დავით დვალმა აღნიშნულ გადაწყვეტილებაზეც ისაუბრა და აღნიშნა, რომ სხვა დროს მას შესაძლოა ეს გადაწყვეტილება არ მიეღო, მაგრამ ბოლო დროს მიმდინარე მოვლენებმა გადააწყვეტინა, დასთანხმებოდა ამ წინადადებას. „რუსთავი 2-ის“ ჟურნალისტის შეკითხვას, თუ რა მოვლენებს გულისხმობს, დავით დვალმა უპასუხა, რომ მან ბოლო დროს უკრაინულ ვებგვერდზე გავრცელებული ჩანაწერები იგულისხმა.
„მე ვხედავ, რომ ექსტრემისტთა ჯგუფი ცდილობს, ფარად ამოიფაროს ტელევიზია და გამოიყენოს ბრძოლის იარაღად. მიუხედავად იმისა, რომ ამით ტელევიზიის რეპუტაციას და იმიჯს აყენებს დარტყმას. მე, როგორც ამ ტელევიზიის დამფუძნებელს მინდა, რომ ტელევიზია ყოფილიყო ნომერ პირველი. მე მინდა, რომ არ დავუშვათ,  ამ ქაოსს შეეწიროს ტელევიზია. გავაგრძელებთ მუშაობას და არავინ ჩაერევა ჩვენს საქმიანობაში. არავის თავში არ მოუვიდეს, ერთი ზარი გააკეთოს ვინმესთან და ზეწოლა იქონიოს" - თქვა დავით დვალმა.