ჯანდაცვის მინისტრ დავით სერგეენკოს განცხადებით, დაგროვებითი პენსიის პროექტზე მუშაობა, ფაქტობრივად, დამთავრებულია. მისი თქმით, 2013 წელს, ეკონომიკის სამინისტროს ხელმძღვანელობით, შეიქმნა სამუშაო ჯგუფი, რომელშიც ჯანდაცვის სამინისტროც მონაწილეობს, პარტნიორობასა და კონსულტაციებს კი მსოფლიო ბანკი უწევს.
„დაგროვებითი პენსია ნიშნავს, რომ ადამიანი მუშაობის პერიოდში გარკვეული თანხის აკუმულირებას ახდენს შესაბამის ფონდებში, რომელიც ეფექტიანად მართავს ამ თანხას, დაგროვებითი მეთოდი ადამიანს საშუალებას აძლევს, როდესაც საპენსიო ასაკს მიაღწევს, მისი პენსია საგრძნობლად მაღალი იყოს, ვიდრე ყველა დანარჩენის“, - განმარტა სერგეენკომ.
როგორც დღეს გამართულ მთავრობის სხდომაზე პრემიერ-მინისტრმა, ირაკლი ღარიბაშვილმა განაცხადა, მთავრობა ინტენსიურად მუშაობს საპენსიო რეფორმაზე. მისი თქმით, ძალიან მნიშვნელოვანია, დაინერგოს პენსიის დაგროვებითი სისტემა და საქართველო მასზე ეტაპობრივად გადავიდეს.
